काठमाडौँ — भदौ २३-२४ मा भएको जेन-जी आन्दोलनको बलमा बनेको सरकारले तोकिएको समयमै निर्वाचन सम्पन्न गरेको छ ।२७ भदौमा प्रधानमन्त्री बनेकी सुशीला कार्कीले फागुन २१ मा प्रतिनिधिसभा सदस्य निर्वाचन गर्ने घोषणा गरेकी थिइन् । बिहीबार देशभर शान्तिपूर्ण रुपमा मतदान सकिएको छ । यही सन्दर्भमा बिहीबार साँझ कान्तिपुरले प्रधानमन्त्री कार्कीसँग गरेको संक्षिप्त कुराकानी : 

तपाईंले नेतृत्व सम्हालेर चुनावकाे घाेषणा गर्दा ताेकिएकै मितिमा चुनाव हुन्छ भन्नेमा संशय थियाे । तर याे सफलता कसरी सम्भव भयाे जस्ताे लाग्छ ? 

हामीलाई आत्मविश्वास थियो, काम गर्न सक्छौँ भन्ने । लगनशीलता भएमा कुनै कुरामा लागिपरे सम्भव हुने रहेछ । चुनौती भए पनि हामी आफ्नो जिम्मेवारीअनुकूलको काम गर्दै गयौँ । हामीमाथि विभिन्न प्रकारले आक्रमण नभएको होइन । बाधा अवरोध नआएको होइन । तर हामी त्यसबाट विचलित भएनौँ। निस्वार्स्थ र निष्ठा राखेर काम गरे फत्ते हुन्छ भन्ने विश्वास थियो । जति अवरोध भए पनि बाटो हामीले छाडेनौँ । 

ताेकिएकै मितिमा चुनाव सम्पन्न भयाे । तपाईं कसलाई धन्यवाद दिन चाहनुहुन्छ र कसकाे भूमिका सबैभन्दा महत्वपूर्ण भयाे भन्ने लाग्छ ? 

प्राप्त जिम्मेवारी पूरा गर्न सकेकामा म खुसी छु । तर म एक्लैले यो सम्भव भएको होइन । सिंगो मन्त्रिपरिषद्को मेहनत लागेको छ । निर्वाचन आयोग, सुरक्षा निकाय, कर्मचारी, राजनीतिक दल, उम्मेदवार सबैको भूमिका छ । खास गरी हाम्रो आह्वान स्वीकार गरेर निर्वाचनमा सहभागी हुनुहुने नेपाली जनताले नै यसलाई सफल बनाउनुभएको हो । उहाँहरू सबैलाई धन्यवाद छ ।

सहिद परिवार र घाइते योद्धाहरूको उच्च संयम र समझदारीका कारण पनि यो प्रक्रिया सम्पन्न हुन सम्भव भएको छ। यो भनेको लोकतन्त्र, स्थायित्व, शान्ति र यो देशको भविष्यप्रति उहाँहरूको चिन्ता पनि अनि समर्पण पनि हो। उहाँहरू सबैलाई कोटीकोटी नमन।

समयमै चुनाव सम्पन्न गर्दा तपाईंले कहीँकतै सम्झाैता गर्नुभयाे भन्ने पनि छ । जस्ताे कि, कार्की आयाेगकाे प्रतिवेदन चुनाव अघि सार्वजनिक भएन । मुखै हेर्दिनँ भन्ने पुराना दलका नेतृत्वसँग पनि संवाद गर्नुभयाे । यसमा के भन्नुहुन्छ ? 

आयोगले प्रतिवेदन बुझाउनासाथ कार्यान्वयनमा जान्छ। मैले भन्दै आएकी छु, मुलुकमा कुनै पनि प्रकारको दण्डहीनताले ठाउँ पाउनुहुँदैन। अहिलेको आयोगको मात्र होइन, अरु पनि त्यस्ता प्रतिवेदन छन् भने ती हेर्छौँ र सार्वजनिक गरिदिन्छौँ। ताकि जनताले थाहा पाऊन्।

ठूलो रक्तपातको पृष्ठभूमिमा जेन-जीहरूको मागबमोजिम यो सरकार बन्यो। सुरुमा सबै पक्षसँग संवाद गर्ने अवस्था पनि थिएन। तर, विस्तारै सबै पक्षलाई विश्वासमा लिँदै संवाद र सौहार्दता बढाउँदै गयौँ। सबै पक्ष एक ठाउँमा आउनुको विकल्प थिएन। त्यसको उपयुक्त लोकतान्त्रिक निकासको माध्यम चुनाव नै हो भन्ने सबैलाई बोध भयो।