काठमाडौँ — यो क्षेत्रका उम्मेदवारहरू मतदाताको घरदैलो पुगेर प्रचारप्रसार त गरिरहेकै छन्, सामाजिक सञ्जालमार्फत पनि मतदाताको हातहातमा आफ्ना एजेन्डा पुर्‍याइरहेका छन् । यसरी चुनावी प्रतिस्पर्धामा रहेका दाङ-२ बाट रास्वपा उम्मेदवार तथा पार्टी सहमहामन्त्री विपिनकुमार आचार्यसँग कान्तिपुरका जयसिंह महरा र दुर्गालाल केसीले गरेको कुराकानीको सम्पादित अंश :

पहिलोपटक उम्मेदवार भएका व्यक्ति भोट माग्दै घरदैलो आउँदा मतदाताले के माग गर्दा रहेछन् ?

नागरिकले के खोज्छन् भन्ने आकलन गरेर हामीले पार्टी स्थापना गरेका हौं । उम्मेदवार भइसकेपछि चुनावी अभियानमा हिँड्दा मैले नागरिकहरूका दुईवटा पक्ष पाएँ, चुनावभन्दा अगाडि नेता जसरी नागरिकसँग जोडिन खोज्छ, चुनाव पछाडि पनि त्यो कायम रहोस् । लगभग शतप्रतिशतले के भन्नुभएको छ भने- तिमीलाई भोट त दिने हो, तर भोट लिएर जितिसकेपछि आउनु है । दोस्रो, पूरा गर्न सक्ने बाचाहरू मात्रै गरियोस् । 

हामी पटक-पटक पूरा गर्न नसकिने बाचाहरूको शिकार भएका छौँ । मतदाता भन्छन्- यो पटक तपाईंले जुन बाचाहरू गर्नुहुन्छ, त्यो पूरा गर्ने हो ? होइन भने हामीलाई नझुक्याउनुहोला । किनकी, हामी अन्तिमपटक राजनीतिक दल अथवा राजनीतिक आस्थामा विश्वास गर्दैछौँ । योपटक पनि तपाईंहरूले हाम्रो विश्वासमा घात गर्नुभयो भने राजनीतिक नामको चिजप्रति नै विश्वास उठ्छ ।

मतदाताले नेताबाट पुल, सडक, सिंचाइ र मललगायतका समस्या समाधान मागिरहेको देखेका छौं । अर्कोतिर उम्मेदवारले भोट प्राप्त गर्नका लागि गाउँ-गाउँमा हेलिप्याड निर्माण गरिदिन्छुसमेत भनिरहेका छन् । तपाईंको क्षेत्रमा यो पुल, सडकलगायतका विकास आयोजना कत्तिको माग्नुभएको छ ?

त्यो त अवश्य छ । सबैको अपेक्षा छ, कसैले नाला मागिरहेका छन्, कसैले बाटो पीच मागिरहेका छन्, कसैले डीप बोरिङ मागिरहेका छन् । कसैले दैनिक रोजीरोटीसँग प्रत्यक्ष-परोक्ष सम्बन्ध राख्ने कुराहरू नै माग्नुभएको छ । म त्यसमा चाहिँ बढी दोष नागरिकहरूलाई भन्दा पनि हाम्रो नेतृत्वलाई दिन्छु । 

चुनावको बेला नागरिकलाई दोष दिन पनि भएन नि हैन ?

मैले नागरिकलाई दोष दिन मिल्दैन । यो निर्वाचनमा सबैभन्दा ठूलो च्यालेन्ज भनेको नागरिकहरूलाई एउटा प्रतिनिधिसभा सदस्यको काम र अधिकार बुझाउने हो । मैले त मेरो बाचापत्रको एक खण्डमा प्रतिनिधिसभा सदस्यका काम, कर्तव्य र अधिकारबारे भिडियो बनाउँदा र प्रिन्टेड फर्ममा पनि त्यो राखेको छु । किनकी हामीले पूरा गर्न नसकिनेको बाचाको भारी बोकाइदिँदा मतदातामाथि ज्यादती हुन्छ ।

मतदाताले राखेका समस्या दाङका मात्र समस्या होइनन् । म केन्द्रको नेता वा व्यक्ति हुँदै गर्दा त्यसलाई कसरी सोच्छु भने, समस्या पूरै केन्द्रको हो । जे अपेक्षा उहाँहरूले राख्नुभएको छ, त्यसको समाधान गर्ने सबैभन्दा वैज्ञानिक उपाय विधि हो ।  

६ महिनामा सारा समस्या हल हुँदैन, समय लाग्छ । तर हामी त्यो समय माग गर्ने आधारहरू तय गर्छौँ । एउटा प्रतिनिधिसभा सदस्यसँग न हेलिकोप्टर बनाइदिने ल्याकत हुन्छ, न उसले हरेक टोल-टोलमा नाला बनाइदिने हो । कतिपय ठाउँमा नागरिकले 'यो १० दिनमा तपाईंले नाला बनाइदिनुभयो भने म तपाईंलाई भोट हाल्छु' भन्नुभयो, तर मैले 'सक्दिनँ हजुर' भनेर माफी मागे । नागरिकका अपेक्षाहरूलाई विधि र पद्धतिबाट कसरी निराकरण गर्न सकिन्छ, मेरो बाचापत्रको ध्येय हो ।

पुराना पार्टीहरूले नगरेकाले हामी विकल्पमा आयौँ भनेर मतदाताकहाँ गइराख्नुभएको छ । मतदाताका अपेक्षा तत्काल पूरा गर्नसक्ने आधारहरू के छन् ?

म जहिले पनि अपेक्षालाई 'टोन डाउन' गर्नुपर्छ भन्ने व्यक्ति हो । राष्ट्रिय स्वतन्त्र पार्टीसँग कुनै जादुको छडी छैन । हामीले पहिलो फेजमा गर्ने भनेको सही नेतृत्व सरकार चलाउने ठाउँमा पुग्दा सुशासनको प्रत्याभूति हुन सक्छ भन्ने अनुभूति नागरिकलाई गराउने हो । ६ महिनामा सारा समस्या हल हुँदैन, समय लाग्छ । तर, हामी त्यो समय माग गर्ने आधारहरू तय गर्छौँ । जनतालाई विश्वास दिलाउने हो कि- परिवर्तन सम्भव छ । 

नेपाली राजनीतिज्ञको एउटा अप्ठ्यारो पक्ष कस्तो छ भने धेरै नेताहरूको ध्यान चुनाव जित्नेमा मात्रै भयो । चुनाव जितिसकेपछि राज्यसत्ता सञ्चालन गर्ने बेला स्रोतहरूको सदुपयोग कसरी गर्ने, प्रणालीमा देखिएका समस्या कसरी समाधान गर्ने भन्ने तयारी कहिल्यै भएन । अनि डेलिभरी भएन । म केन्द्रीय नेताका रूपमा विधि र फ्रेमवर्क बनाउनु पर्छ भन्ने चिजमा बढी लाग्ने भएको कारणले, त्यो फ्रेमवर्कले नै काम गर्ने हो । त्यसलाई ड्राइभ गर्ने भनेको पार्टी कसरी सञ्चालन हुन्छ भन्ने कुरा हो ।

चुनावका क्रममा रास्वपामाथि प्रश्न उठ्दै आएको छ कि अन्य राजनीतिक दलको वा आलोचना सहन नसक्ने भयो, विपक्षी दलका नेता र कार्यकर्तामाथि  'साइबर अट्याक' गर्ने संस्कृति विकास गरेको छ । रास्वपाका कार्यकर्ता किन अरूको कुरा सुन्न तयार छैनन् ?

पार्टी स्थापना भएको साढे तीन वर्ष मात्र भयो । स्कुलिङका लागि समय पर्याप्त छैन । तर, व्यक्तिगत रूपमा पार्टीको केन्द्रमा बसेका साथीहरूको 'थट प्रोसेस' भनेको- हामी सबैभन्दा बढी सहनशील हुनुपर्छ र अर्काको फरक विचारलाई स्वीकार्नुपर्छ भन्ने हो । मैले दाङ र देशभरका साथीहरूलाई सधैँ 'जित्नका लागि अर्कालाई गाली नगरौँ, सकारात्मक कुरामा फोकस गरौँ' भनेर अपिल गरिरहेको छु ।

तर नागरिकका रूपमा मान्छेमा यति धेरै आक्रोश छ कि त्यो सामाजिक सञ्जालमा पोखिएको छ । त्यसलाई 'टोन डाउन' गर्ने जिम्मा पार्टीको हो । कसैलाई जे पनि भनिदिने प्रथा सभ्य समाजका लागि सही होइन । चुनाव पछाडि मेरो एउटा प्रमुख प्राथमिकता सामाजिक सञ्जालमा देखाउने आचरणलाई कसरी सही बनाउने भन्ने हुनेछ ।

तपाईं पार्टी सहमहामन्त्री हुनुहुन्छ, समानुपातिक उम्मेदवार चयन गर्ने उपसमितिको आफैँ संयोजक हुनुहुन्थ्यो । समानुपातिक बन्दसूचीको खस आर्य क्लस्टरमा एक नम्बरमा नाम राख्नुभयो, पछि काठमाडौं-२ बाट उम्मेदवार बन्ने चर्चा थियो तर दाङ आइपुग्नुभयो नि ?