‘विगतमा प्रतिस्पर्धाको परिणामलाई स्वीकार नगर्ने अथवा पराजितलाई दोस्रो नागरिक जस्तो व्यवहार गर्ने हुनु हुँदैन ।’ –ईश्वर पोखरेल
What you should know
काठमाडौँ — एमालेमा आन्तरिक एकता कायम राख्ने जिम्मा अध्यक्ष केपी शर्मा ओलीको ‘कोर्टमा’ मा पुगेको ईश्वर पोखरेल नेतृत्वको इतर पक्षले निष्कर्ष निकालेको छ । शनिबार भएको इतर पक्षको भेलाले पार्टीभित्र नेतृत्वका लागि भएको प्रतिस्पर्धालाई आधार बनाई पक्षपात, गुटबन्दी, काखापाखा र भेदभाव गरे प्रतिवाद गर्ने निर्णय पनि गरेको छ ।
यसै सन्दर्भमा एमाले नेता ईश्वर पोखरेलसँग कान्तिपुरकर्मी गंगा बीसीले गरेको कुराकानी :
नेतृत्वका लागि प्रतिस्पर्धा गर्नुभयो तर अपेक्षित परिणाम आएन । अब कसरी अघि बढ्नुहुन्छ ?
महाधिवेशनसित सम्बन्धित विभिन्न विषयमा समीक्षा आफ्नो ठाउँमा छ । तर महाधिवेशनले सबै विषय टुंगो लगाइसकेकाले अब निर्वाचित नेतृत्वलाई मानेर जानुपर्छ । यो भनिरहँदा जुन हामीले उठाएका विचारहरू छन्, खासगरी पार्टीलाई विधि, पद्धतिअनुसार चलाउनुपर्छ । पार्टीमा सामूहिक नेतृत्व हुनुपर्छ । पार्टीलाई सामूहिक नेतृत्व लिएर सुधार हुनुपर्छ । पार्टीमा नियन्त्रण सन्तुलनको जुन प्रबन्ध छ, जनताको बहुदलीय जनवाद (जबज) व्यवस्था गरेको कुरा सबल बनाउनुपर्छ । यो विषयमा हामीले आवश्यकताअनुसार पार्टीमा छलफल, बहस गर्छौं । विगतमा प्रतिस्पर्धाको परिणामलाई स्वीकार नगर्ने अथवा पराजितलाई दोस्रो नागरिक जस्तो व्यवहार गर्ने हुनु हुँदैन ।
तपाईं पक्षका दुई पदाधिकारी र एक दर्जन केन्द्रीय सदस्यले जित्नुभएको छ । पार्टीभित्र कस्तो भूमिका खेल्नुहुन्छ ?
यसमा अब पार्टी अध्यक्ष, निर्वाचित भएको नेतृत्वले यो कुरालाई कसरी सम्बोधन गर्छ । हेर्नुपर्छ । अहिले नै यसमा यो, त्यो भन्नु उचित हुँदैन ।
नेतृत्वका लागि भएको चुनावपछि अध्यक्ष केपी शर्मा ओली र तपाईंबीच भेट वा कुराकानी भयो ?
हुन पाएको छैन । राम्रो ढंगले पार्टीलाई अघि बढाउनु हुने अपेक्षा छ र यसमा हाम्रो साथ समर्थन हुन्छ ।
तपाईं अध्यक्षमा पराजित भए पनि केन्द्रीय कमिटीमा हुनुहुन्छ । अब जिम्मेवारी के हुन्छ ?
मेरो कुनै ‘डिमान्ड’ छैन । केन्द्रीय कमिटीमा निर्वाचित भएको कारणले जे भूमिका पूरा गर्नुपर्ने हो, त्यो गर्छु ।
