काठमाडौँ — एक वर्ष पूरा हुँदा पनि सरकारले जनअपेक्षाअनुसार काम गर्न सकेको छैन । मन्त्रीहरू एकपछि अर्को विवादमा पर्दै आए, एमालेका दुई मन्त्री फेरिए । त्यसैले पनि प्रधानमन्त्री ओली केही सातायता मन्त्रिपरिषद् पुनर्गठनमा जोडबल गरिरहेका छन् तर कांग्रेस सभापति शेरबहादुर देउवाको अनिच्छाले हलो अड्किएको छ । यसै सन्दर्भमा कांग्रेस उपसभापति - पूर्णबहादुर खड्कासँग कान्तिपुरले गरेको कुराकानी :

बालुवाटारमा बिहीबार मन्त्रिपरिषद् पुनर्गठनसम्बन्धी छलफल भएन ?

संघीय सरकारका मन्त्रीहरू बदल्नेबारेमा चर्चा, छलफल, प्रसंग केही चलेन । त्यस विषयमा कुनै एजेन्डा पनि होइन । बाहिर कसरी आयो, थाहा भएन ।

कांग्रेस सभापति देउवाले मन्त्रीहरू बदल्न नचाहेका कारणले प्रधानमन्त्रीले निर्णय लिन नसक्नुभएको भन्ने कुरा आइरहेका छन् नि ?

होइन, बेकारको हल्ला हो । म भएको कुनै पनि बैठकमा मन्त्री बदल्ने कुरा कुनै चर्चा भएको छैन ।

कांग्रेसले नचाहे पनि प्रधानमन्त्रीले त चाहनुभएको हो नि ?

म मन्त्री बदल्छु भनेर प्रधानमन्त्रीले भन्नुभएको छैन । म संलग्न कुनै पनि मिटिङमा मन्त्री बदल्नेबारे बोल्नुभएको छैन । बरु मन्त्रीहरूलाई अलि प्रभावकारी काम गर, सार्वजनिक सेवाका काममा सक्रिय होऔ भनेर भन्नुपर्ने भएको छ । म पनि भन्छु, तपाईंहरूले पनि भन्नुपर्‍यो भनेर बेलाबेलामा भन्ने गर्नुभएको छ । तर मन्त्री बदल्ने कुरा प्रधानमन्त्रीको मुखमा आएको छैन । आज सुधारका केही सकारात्मक कुरामा छलफल भयो । उहाँहरू दुई जनाबीच ‘वान टु वान’ कुरा भएको भए थाहा भएन तर यो विषयमा कुनै प्रसंग नै आएन ।