काठमाडौँ — राष्ट्रपतिको दुई कार्यकाल सकेर शीलतनिवासबाट बाहिरिएको दुई वर्ष साढे तीन महिनापछि विद्यादेवी भण्डारीले शनिबार पार्टी राजनीतिमा फर्किएको औपचारिक घोषणा गरेकी छन् । केपी शर्मा ओली एमालेको नेतृत्वमा निर्विकल्प जस्तै बनिरहेका बेला भण्डारीको सक्रिय राजनीतिमा प्रवेश घोषणाले एमालेमा हलचल भएको छ ।

विधान महाधिवेशन गर्ने तयारीमा रहेको एमालेमा भण्डारीलाई अध्यक्ष लागिएको हो त? एमाले स्थायी कमिटी सदस्य भानुभक्त ढकालसँग गरिएको संक्षिप्त कुराकानी : 

पूर्वराष्ट्रपति विद्यादेवी भण्डारीको सक्रिय राजनीतिको घोषणाले पार्टीभित्र फेरि शक्तिसंघर्ष हुन खोजेको हो ? 

मलाई त्यस्तो लागेको छैन । उहाँ एमालेमै हुर्किनुभएको, एमालेकै नेतृत्व गर्नुभएको अनुभवी नेता हुनुहुन्छ । पार्टी कुनै दुर्घटनामा नजाओस् भन्नेमा हामीभन्दा पनि विशेष सचेत हुनुहुन्छ । फेरि उहाँले गर्दाखेरि ध्रुवीकरण बढ्ने हो र, होइन । 

विधान महाधिवेशनको संघारमा घोषणा गर्नुभएकाले दुई नेताबीचको शक्तिसंघर्ष सुरु हुन्छ भन्छन् नि ? 

एमालेमा कोही मान्छे आउनु र थपिनुले चिन्ता बढ्दैन । बरु एमाले छोडेर जानेका कारण चिन्ता बढ्छ । परिवारमा सदस्य वृद्धि हुने कुराले शक्तिसंघर्ष नै हुन्छ भन्ने लाग्दैन ।  

राष्ट्रपति भइसकेको मान्छे, अभिभावक भएर बस्नुपर्छ, सक्रिय राजनीतिमा आउने होइन भन्ने कोणबाट पनि बहस भएको थियो नि ? 

त्यो बहस त चल्ला नि अब । महाधिवेशनमा चल्ला । सडक, सडकमा चल्ला । पत्रिकामा मात्र बहस चलाएर के निष्कर्षमा पुगिएला र !  

पार्टीमा ७० वर्षको उमेर हद र दुई कार्यकालभन्दा बढी नेतृत्वमा बस्न नपाउने व्यवस्था त अहिले पूर्वराष्ट्रपति भण्डारीकै तर्फबाट मुद्दा बन्दै छ नि त ? 

 दुई कार्यकालको प्रावधान एमालेको कुनै विधि–विधानमा छैन । त्यो मनगणन्ते कुरा हुन् । ७० वर्षको प्रावधान उपयुक्त हुन्छ कि भनेर परीक्षणमा ल्याएका थियौं । त्योचाहिँ पनि कामयाबी भएन भनेर केन्द्रीय कमिटी बैठकबाट परिमार्जन गरिसकेका छौं । ७३–७४ वर्षका मान्छे पनि यो बीचमा पार्टीमा ल्याइएकै छ । 

 केपी शर्मा ओलीलाई नेतृत्वमा राख्न यहीँ प्रावधान विधानमा राख्नुपर्छ भनेर मुद्दा बनाउन खोजिएको भन्ने चर्चा छ नि ? 

विधानमा के–के राखिन्छ, त्यो त त्यतिखेरको कुरा भो । आगामी ५ साउनमा केन्द्रीय कमिटी बैठक छ । त्यसपछि के राख्ने, के नराख्ने भन्ने कुरा पहिले नै बाहिर–बाहिर छलफल गरेर निष्कर्षमा पुगिन्छ र ! 

पार्टीभित्रै यो बहस चलिरहेको छ नि त ? 

बहस त आउँछ, छलफल हुन्छ । विधिवत् रूपमा के लाने, के नलाने भन्ने कुरो त केन्द्रीय कमिटी बैठकले छलफल गर्छ । विधिसम्मत ढंगले कसरी गर्ने ? अहिले परिवर्तित अवस्थामा पार्टीलाई कसरी सुदृढ, व्यवस्थित गर्ने भन्ने विषयमा छलफल गरिन्छ ।

 अब विद्या भण्डारीलाई एमालेको वैकल्पिक नेताका रूपमा हेर्न थालियो नि, होइन ? 

महाधिवेशन ओपन भएपछि क–कसले के–के बोल्नुहुन्छ, कुन ढंगले जानुहुन्छ भन्ने कुरा त्यतिखेर हुने हो । वैकल्पिक त के भन्ने र ? अध्यक्षले केपी कमरेडले सार्वजनिक फोरममै एकपटक दोहोर्‍याउँछु भन्नुभएकै छ । उहाँ नै अघि सर्नुहुन्छ । वैकल्पिक भनेको त आफूले छोड्दाखेरी बनाउने न हो । पूर्वराष्ट्रपतिको प्रवेश हुँदैमा उहाँले छोड्नेजस्तो कुरो त हुँदैन । उहाँ राष्ट्रपति हुनुभो, बाहिर रहनुभो, अब एमालेमा सक्रिय राजनीतिमा आउने भन्नुभएको छ ।