काठमाडौँ — विभिन्न ८ विश्वविद्यालयका उपकुलपति बन्न २ सय १८ जनाको आवेदन परेको शिक्षा तथा खेलकुद मन्त्रालयले जनाएको छ ।

सरकारले त्रिभुवन विश्वविद्यालयसहित पूर्वाञ्चल, पोखरा, लुम्बिनी बौद्ध, कृषि तथा वन विज्ञान, मध्यपश्चिम, सुदूरपश्चिम र राजर्षि जनक विश्वविद्यालयका उपकुलपति पदका लागि २५ वैशाखमा अनलाइन दरखास्त आह्वान गरेको थियो । त्यसमा २ सय १८ जनाको आवेदन परेको शिक्षा तथा खेलकुद मन्त्रालयले जनाएको छ । एक जनाले बढीमा दुई विश्वविद्यालयको उपकुलपतिका लागि आवेदन दिन सकिने व्यवस्था गरिएको छ । ‘कतिपयले दुवैतिर आवेदन दिएका छन् । आवेदनहरु रुजु गर्दैछौं । रुजु सकेपछि आवेदन स्वीकृत गरेर संक्षिप्त सूची सार्वजनिक हुनेछ,’ उपकुलपति छनोट तथा सिफारिस समिति निकट स्रोतले भन्यो ।

समितिले उपकुलपति छनोटसम्बन्धी कार्यविधि आवेदनकै क्रममा जारी गरेको थियो । जसमा ३५ पूर्णांकमा व्यक्तिगत विवरणहरुको मूल्यांकन गरी संक्षिप्त सूची तयार पारिने उल्लेख छ । कुल १ सय पूर्णांकमध्ये बाँकी ६५ पूर्णांकमा उम्मेदवारको विश्वविद्यालयसम्बन्धी सोचपत्र, कार्ययोजना, त्यसको प्रस्तुति र अन्तर्वार्ता लिई मेरिटको आधारमा सिफारिस गर्ने कार्यविधिमा उल्लेख छ । शिक्षामन्त्री सस्मित पोखरेलको नेतृत्वमा बनेको सिफारिस समितिमा शिक्षा सचिव चुडामणि पौडेल र राष्ट्रिय योजना आयोगमा शिक्षा हेर्ने सदस्य रेसु अर्याल ढुंगाना सदस्य छन् । सिफारिस समितिले विज्ञ नियुक्त गरी आवेदनहरुको सोचपत्र, कार्ययोजनाको मूल्यांकन र अन्तर्वार्ता लिने कार्यविधिमा व्यवस्था गरिएको छ ।