ग्रीन तारा चाइल्ड हेभेन स्कुललाई अपाङ्ग विद्यार्थीहरूको पठनपाठनमा पुर्याएको योगदानको लागि ३ लाख राशिको यशोधरा पन्त शिक्षा सम्मान प्रदान गरिएको हो।
काठमाडौँ — गोकर्णेश्वर नगरपालिका–९ स्थित ग्रीन तारा चाइल्ड हेभेन स्कुललाई अपाङ्ग विद्यार्थीहरूको पठनपाठनमा पुर्याएको उल्लेखनीय योगदानको लागि ३ लाख राशिको यशोधरा पन्त शिक्षा सम्मान प्रदान गरिएको छ।
कलंकीस्थित एलआरआई स्कुलले ३८ औं वर्षिकोत्सवका अवसरमा सामाजिक उत्तरदायित्वको उदाहरण प्रस्तुत गर्दै सम्मानसँगै नगद पुरस्कार प्रदान गरेको विज्ञप्तिमा जनाएको छ । विद्यालयले विशेष आवश्यकता भएका बालबालिकालाई शिक्षाको मुख्यधारामा ल्याउने प्रयासलाई उच्च मूल्यांकन गर्दै पुरस्कार प्रदान गरेको जनाएको छ ।
सोही अवसरमा एलआरआईले देशभरका उत्कृष्ट शिक्षाविद्हरूलाई पनि सम्मान गरेको छ। यस वर्ष सम्मानित हुने शिक्षाविद्हरूमा काभ्रेका उदिम पन्त, कैलालीका पदमसिंह कुँवर, कैलालीकै प्रेमनिधि ओझा, ललितपुरका भोलनाथ ओझा, काठमाडौंका अनुमोदन केसी र कास्की पोखराका किरण सापकोटा छन् । शिक्षा विकास, शिक्षक प्रशिक्षण, विद्यालय व्यवस्थापन र विद्यार्थीको समग्र विकासमा पुर्याएको योगदानको कदर गर्दै विद्यालयले सबैलाई जनही २५ हजार रुपैयाँसहित सम्मान गरेको हो ।
खेलकुद क्षेत्रमा उत्कृष्ट योगदान पुर्याउने डाइमन्ड स्पोर्ट्स, कलेज रिडर्सका संस्थापक जितेन्द्र घिमिरे, सञ्चारकर्मी ईश्वर ढकाललाई पनि सम्मान गरिएको जनाईएको छ ।
विद्यालयले आन्तरिक रूपमा उत्कृष्ट कार्य गर्ने शिक्षक तथा कर्मचारीहरूलाई पनि नगद पुरस्कार र प्रमाणपत्र प्रदान गरी सम्मान गरेको छ । साथै, शैक्षिक सत्रभर उत्कृष्ट नतिजा हासिल गर्ने विद्यार्थीहरूलाई पनि पुरस्कार प्रदान गरिएको छ ।
कार्यक्रमका काठमाडौं विश्वविद्यालयका उपकुलपति अच्युतप्रसाद वाग्ले, एलआरआईका संस्थापक शिवराज पन्त लगायतले सम्मान तथा पुरस्कार हस्तान्तरण गरेका थिए ।
