आयोगले आफ्नो वार्षिक कार्यतालिकाअनुसार गत मंसिरको अन्तिम बुधबार विज्ञापन प्रकाशित गर्दै निजामती सेवातर्फ खुला तथा समावेशी समूहमा दरखास्त आह्वान गरेको थियो ।
काठमाडौँ — लोक सेवा आयोगले निजामती सेवातर्फ १८९ शाखा अधिकृत (अप्राविधिक) पदका लागि लिएको प्रारम्भिक परीक्षा (पहिलो पत्र) मा २३ हजार ४५९ जना विद्यार्थी सहभागी भएका छन् ।
आयोगका अनुसार निजामती सेवातर्फका परराष्ट्र प्रशासन, लेखा परीक्षण, संघीय संसद् तथा राजस्व सेवातर्फको प्रारम्भिक परीक्षाका लागि कुल २७ हजार १७ जना विद्यार्थीले आवेदन दिएका थिए । तीमध्ये २३ हजार ४५९ जना अर्थात् ८६.४८ प्रतिशत विद्यार्थी परीक्षामा सहभागी भएका हुन् ।
सहभागीमध्ये काठमाडौं उपत्यकाभित्र ११ हजार ६४४ जना (८९.७० प्रतिशत) र उपत्यकाबाहिर ११ हजार ८१५ जना (८४.१६ प्रतिशत) उपस्थित रहेको आयोगले जनाएको छ । आयोगले विज्ञप्ति जारी गर्दै शनिबार देशभर एकसाथ परीक्षा सफल रुपमा सञ्चालन गरिएको जनाएको छ ।
लोक सेवा आयोगका सहसचिव एवं प्रवक्ता पुरुषोत्तम शर्माले उत्साहजनक सहभागिताका साथ परीक्षा सम्पन्न भएको जानकारी दिएका छन् । उनका अनुसार अप्टिकल मार्क रिडर (ओएमआर) प्रविधिबाट उत्तरपुस्तिका परीक्षण गरी नतिजा १५ दिनभित्र प्रकाशन गर्ने लक्ष्य लिइएको छ ।
आयोगले आफ्नो वार्षिक कार्यतालिकाअनुसार गत मंसिरको अन्तिम बुधबार विज्ञापन प्रकाशित गर्दै निजामती सेवातर्फ खुला तथा समावेशी समूहमा दरखास्त आह्वान गरेको थियो । पहिलो पत्र उत्तीर्ण गरेपछि मात्र विद्यार्थीले आगामी चरणका परीक्षा दिन पाउने व्यवस्था रहेको आयोगले जनाएको छ ।
