विदेशी सम्बन्धनका शिक्षण संस्थाले लिने शुल्क १५ दिनभित्र मन्त्रालयमा बुझाउनुपर्ने
What you should know
काठमाडौँ — शिक्षा, विज्ञान तथा प्रविधि मन्त्रालयले शिक्षण संस्थामा डिसिप्लिन इन्चार्ज (डीआई) नराख्न निर्देशन दिएको छ । विद्यार्थीलाई अनुशासनमा राख्न भन्दै डीआई राखेको गुनासो आएकाले तत्काल हटाउन मन्त्रालयले निर्देशन जारी गरेको छ ।
शिक्षामन्त्री महावीर पुनले विदेशी शिक्षण संस्थाको सम्बन्धनमा उच्च शिक्षा सञ्चालन गर्ने शिक्षणसंस्थालाई १० बुँदे निर्देशन जारी गर्दै नियम र सर्तहरू पालना गर्न स्मरण गराएका छन् ।
‘शिक्षण संस्थाभित्र विद्यार्थीलाई अनुशासनमा राख्न भनि डिसिप्लिन इन्चार्ज (डीआई) राख्ने गरेका र त्यसबाट विद्यार्थीको सिकाइमा नकारात्मक असर परेको गुनासो प्राप्त हुन आएकाले छ । त्यस्तो व्यवस्था शिक्षणसंस्थामा गरेको भए तत्काल हटाइ विद्यार्थीलाई सहयोग र सल्लाह प्रदान गर्नका लागि विद्यार्थी परामर्श कक्ष स्थापना गरी विद्यार्थीलाई उचित परामर्श प्रदान गर्नुपर्नेछ,’ निर्देशनमा भनिएको छ । कक्षबाट विद्यार्थी, अभिभावक एवं सरोकारवालाबाट प्राप्त हुने गुनासो सम्बोधन गर्न आग्रह गरिएको छ ।
त्यस्तै विदेशी सम्बन्धनका शिक्षण संस्थाले लिने शुल्क १५ दिनभित्र सार्वजनिक गर्न र मन्त्रालयमा समेत बुझाउन शिक्षा मन्त्रालयले निर्देशन दिएको छ । ‘विद्यार्थीबाट लिइने कार्यक्रमगत सबै प्रकारका शुल्क विवरण पारदर्शी रूपमा सबैले देख्ने गरी राख्ने र सोको प्रमाणित प्रति मन्त्रालयमा अनिवार्य रूपमा १५ दिनभित्र पेस गर्नुपर्नेछ,’ निर्देशनमा भनिएको छ । मन्त्रालयले प्रति कक्षा रहने विद्यार्थी संख्या, कक्षागत सिकाइ क्रियाकलाप समेत सार्वजनिक गर्न भनेको छ ।
शिक्षण संस्थालाई अनुमति दिइएका विषय, तह र अवधिका कार्यक्रम निर्धारित स्थानमा मात्र सञ्चालन गर्न निर्देशन दिइएको छ । विद्यार्थीलाई पारदर्शी र निष्पक्ष तरिकाले छात्रवृत्ति उपलब्ध गराउनुपर्ने र सोको विवरण मन्त्रालयमा पठाउन ताकेता गरिएको छ । विषयगत दक्षता र योग्यता पुगेका शिक्षकलाई मात्र पठनपाठनमा संलग्न गराउन निर्देशन दिइएको छ ।
