काठमाडौँ — त्रिभुवन विश्वविद्यालयले नयाँ विषय र कार्यक्रम सञ्चालनका लागि आङ्गिक र निजी क्याम्पसलाई सम्बन्धन बाँड्ने नीति तथा कार्यक्रम अघि सारेको छ भने विद्यार्थी संख्या कम्ती रहेका क्याम्पसहरूलाई समायोजन गर्ने भएको छ ।

त्रिविको आर्थिक वर्ष २०८२/०८३ को नीति तथा कार्यक्रममा आङ्गिक र सम्बन्धन प्राप्त (निजी, सामुदायिक) क्याम्पसमा आवश्यकताअनुसार कार्यक्रम तथा विषय थपको प्रक्रिया अगाडि बढाउने उल्लेख छ ।

त्यस्तै विगत दुई शैक्षिक सत्रदेखि न्यून विद्यार्थी संख्या भएका क्याम्पसका कार्यक्रमहरू आगामी शैक्षिक सत्रदेखि गाभिने प्रक्रिया अगाडि बढाउने जनाइको छ । काठमाडौँ उपत्यका र बाहिरका क्याम्पसहरू समायोजन हुने नीति तथा कार्यक्रममा उल्लेख छ । सरकारको नीति तथा कार्यक्रममा पनि उक्त व्यवस्था समावेश थियो । विश्वविद्यालय अनुदान आयोगले समायोजन हुने क्याम्पसलाई आर्थिक सहयोग गर्ने कार्यक्रम नै अघि सारेको छ ।