काठमाडौँ — त्रिभुवन विश्वविद्यालयले विदेशमा रहेका नेपालीलाई अनलाइनबाट पढ्न पाउने व्यवस्था गर्ने भएको छ। बुधवार त्रिवि सभामा पेस हुने नीति तथा कार्यक्रममा प्रयोगात्मक कक्षा नहुने विषय क्याम्पसमार्फत् अनलाइन माध्यमबाट पढाउने व्यवस्था गर्ने उल्लेख छ ।

विदेशबाट अनलाइन पढ्ने विद्यार्थीहरूको परीक्षा नेपाली दुतावाससँगको सहकार्यमा भौतिक उपस्थितिमा नै सञ्चालन हुने जनाइएको छ ।

अध्ययन पुरा गरी शैक्षिक उपाधि सहित स्वदेश फर्किँदा नेपाली नागरिकलाई आर्थिक र शैक्षिक गरी दोहोरो लाभ मिल्ने त्रिविले जनाएको छ । नेपाल खुला विश्वविद्यालयले स्वदेश र विदेशमा रहेका विद्यार्थीलाई अनलाइनबाट पठनपाठन र अनलाइनबाटै परीक्षा दिने व्यवस्था गर्दै आएको छ।  कोभिड महामारीका बेला अन्य विश्वविद्यालयमा पनि अनलाइन पठनपाठन र परीक्षाको व्यवस्था गरिएको थियो ।