डडेलधुरा — सुदूरपश्चिम प्रदेशकी सामाजिक विकास राज्यमन्त्री सरस्वती खड्काले शिक्षा समाज परिवर्तनको मेरुदण्ड रहेको बताएकी छिन् । डडेलधुरा बहुमुखी क्याम्पसको ३०औं वार्षिकोत्सवको अवसरमा क्याम्पसमा शुक्रबार आयोजित कार्यक्रममा बोल्दै उनले यस्तो धारणा राखेकी हुन् ।

राज्यमन्त्री खड्काले विकास निर्माणदेखि सामाजिक रूपान्तरणसम्म शिक्षा अपरिहार्य रहेको उल्लेख गरिन् । विद्यार्थी समाजको सबल शक्ति भएको र उनीहरूले राष्ट्र सञ्चालन गर्ने क्षमता राख्ने भएकाले विद्यार्थी जीवनमै जिम्मेवारीबोध र लगनशीलता आवश्यक हुने उनको भनाइ थियो ।

आफू पनि यही क्याम्पसकी पूर्वविद्यार्थी भएको स्मरण गर्दै उनले महिलालाई पढ्न नदिने विगतको अवस्था अब परिवर्तन भई महिलाहरू उच्च शिक्षातर्फ आकर्षित हुनु सकारात्मक पक्ष भएको बताइन् । साथै, बढ्दो लागुऔषध प्रयोगप्रति चिन्ता व्यक्त गर्दै विद्यार्थीलाई यसविरुद्ध सक्रिय हुन आग्रह गरिन् ।