सत्तारुढ दल कांग्रेसका शिक्षा विभाग प्रमुख तथा केन्द्रीय सदस्य नैनसिंह महरले शिक्षामन्त्री रघुजी पन्तलाई ध्यानाकर्षण बुझाउँदै शैक्षिक परामर्श नियमनमा सरकारलाई सक्रिय हुन आग्रह गरेका हुन् ।
काठमाडौँ — सत्तारुढ दल कांग्रेसको शिक्षा विभागले शैक्षिक परामर्श क्षेत्र नियमन गर्न शिक्षा, विज्ञान तथा प्रविधि मन्त्रालयको ध्यानाकर्षण गराएको छ ।
विभाग प्रमुख तथा केन्द्रीय सदस्य नैनसिंह महरले शिक्षामन्त्री रघुजी पन्तलाई ध्यानाकर्षण बुझाउँदै शैक्षिक परामर्श नियमनमा सरकारलाई सक्रिय हुन आग्रह गरेका हुन् । शैक्षिक परामर्श क्षेत्र सुधारका लागि १० बुँदे प्रस्ताव सार्वजनिक गर्दै सरकारसँग माग गरिएको उनले बताए । नेपाललाई अन्तर्राष्ट्रिय शैक्षिक हब बनाउन परामर्श क्षेत्रलाई साझेदारका रूपमा अघि बढाउनुपर्ने उनको भनाई छ ।
परामर्श व्यवसायलाई व्यवस्थित गर्दै कानुनी र नीतिगत स्पष्टता ल्याउनुपर्ने प्रस्ताव गरिएको छ । विदेशी विद्यार्थीलाई आकर्षित गर्न छात्रवृत्ति कोटा व्यवस्था गर्नुपर्ने, अन्तर्राष्ट्रिय विद्यार्थी भिसा नीतिलाई शीघ्र लागू गर्नुपर्ने सुझाव दिइएको छ । शैक्षिक परामर्शको नाममा दर्ता बिनै कन्सल्टेन्सीहरू सञ्चालनमा रहेको भन्दै सरकारको आलोचना हुँदै आएको छ । कम्पनी ऐनअनुसार दर्ता नगरी वा इजाजत पत्र विना सञ्चालन भइरहेका परामर्श संस्थामाथि कारबाही गर्नुपर्ने, अनलाइनमार्फत मात्र विदेश पठाउनेलाई नियन्त्रण गर्नुपर्ने, ठगी र विसङ्गति रोक्न धरौटी र नियमित अनुगमन व्यवस्था गर्नुपर्ने कांग्रेस शिक्षा विभागको माग छ ।
विदेशमा पढ्न जाने विद्यार्थीलाई न्यूनतम मापदण्ड पूरा गरेका विश्वविद्यालयमै पठाउने व्यवस्था गर्नुपर्ने उल्लेख छ । नक्कली विवाह लगायत फर्जी कागजात बनाउने र अवैध वित्तीय कारोबारमा संलग्न परामर्श संस्थामाथि शून्य सहनशीलताको नीतिअनुसार कारबाही गर्नुपर्ने माग गरिएको छ ।
