शिक्षक संघ संगठनका प्रतिनिधिहरुसहित बसेको नगर शिक्षा समितिको बैठकले नियमानुसार सरुवा गरेकाले अनशन छाडेर सम्बन्धित विद्यालयमा हाजिर हुन शिक्षा शाखा प्रमुख नवराज बरालले उनीहरुलाई सुझाएका छन् ।
What you should know
सिन्धुली — साताअघि कमलामाइ नगरपालिका शिक्षा समितिले १५ जना शिक्षकको सरुवा गर्यो । १३ जना शिक्षक रमाना लिएर तोकिएको विद्यालयमा हाजिर भैसकेका छन् ।
साताअघि कमलामाइ नगरपालिका शिक्षा समितिले १५ जना शिक्षकको सरुवा गर्यो । १३ जना शिक्षक रमाना लिएर तोकिएको विद्यालयमा हाजिर भैसकेका छन् । दुई शिक्षक भने अपमानजन सरुवा भनेर तीनदिनदेखि सदरमुकाममा रहेको गौमती नमुना माविको हाताभित्र रिले अनशनमा छन् । रिले अनशन बस्ने शिक्षकहरु हुन् विष्णुप्रसाद फुयाँल र शंकरप्रसाद ढकाल । उनीहरुको गौमती माविबाट सदरमुकाममै रहेको कमला र जनज्योति माविमा सरुवा भएको थियो ।
शिक्षा समितिले शिक्षक महासंघ सिन्धुलीका अध्यक्षसमेत रहेका फुयाँलको आफैंले अध्ययन गरेको विद्यालय कमला मावि ढुंग्रेबासमा सरुवा गरेको थियो । ११ वर्षदेखि गौमतीमा अध्यापन गराइरहेका फुयाँल कमला मावि घर पायक पनि हो । आफू शिक्षक महासंघको अध्यक्ष रहेको र एकवचन सोध्दा पनि नसोधी सरुवा गरेकाले हिनताबोध भइ न्यायका लागि अनशन सुरु गरिएको फुयाँलको भनाइ छ । गौमती माविका शिक्षकसँग प्रतिशोध साँधिएको, विद्यालयमा भएको ब्यथितीको अन्त्य र विद्यालय व्यवस्थापन समितिबाट डर, त्रास र धम्की अन्त्य भइ स्वच्छ शैक्षिक वातावरण हुनुपर्ने माग दुई शिक्षकको छ । उनीहरुको अनशनलाई शिक्षकका संघ, संगठनले आधिकारिक समर्थन भने गरेका छैनन् । विद्यालयमा भएको व्याप्त अनियमितता र स्वेच्छारिताको अन्त्यका लागि आवाज उठाउँदा आफू सरुवाको कोपभाजनमा परेको शिक्षक फुँयालको आरोप छ ।
गौमती नमुना माविमा चरम अनियमितता र ब्यथिती रहेको र त्यसको अन्त्य नभएसम्म सरुवा भएको विद्यालयमा नजाने ढकालको अडान छ ।
शिक्षक संघ संगठनका प्रतिनिधिहरुसहित बसेको नगर शिक्षा समितिको बैठकले नियमानुसार सरुवा गरेकाले अनशन छाडेर सम्बन्धित विद्यालयमा हाजिर हुन शिक्षा शाखा प्रमुख नवराज बरालले उनीहरुलाई सुझाएका छन् ।
नगरप्रमुख उपेन्द्र पोखरेलले कुनै शिक्षकलाई पनि भेद्भाव गरेर सरुवा नगररिएको जिकिर गरे ।
