स्याङ्जा — कक्षा १–३ मा अध्यापन गराउने शिक्षकलाई एकीकृत पाठ्यक्रम तालिम संचालन गरिएको छ । रुम टु रिडको प्राविधिक सहयोगमा स्याङ्जाको वालिङ नगरपालिकाले एकीकृत पाठ्यक्रमसम्बन्धी १० दिने कष्टमाइज्ड तालिम संचालन गरेको हो ।

शिक्षामा गुणात्मक सुधार ल्याउने उद्देश्यले संचालन गरिएको तालिममा नगरभित्र रहेका ६१ वटा सामुदायिक विद्यालयका कक्षा १–३ मा अध्यापन गराउने शिक्षकको सहभागिता रहेको थियो । असार ५ देखि दुई चरणमा तालिम आयोजना गरिएको हो ।

नगर उपप्रमुख कविता तिवारी गैरेले नगरपालिकाले शैक्षिक सुधारका लागि नयाँ कार्यक्रम थप गर्ने योजना अघि सारेको बताइन् । पोसाकमा एकरुपता ल्याउन सामुदायिक विद्यालयका विद्यार्थीलाई पोसाक वितरण गर्ने, प्रत्येक विद्यालयमा योगाभ्यास संचालन गर्ने र सामुदायिक विद्यालयमा संस्थागतजस्तै शैक्षिक गतिविधि संचालन गर्ने तिवारीले सुनाइन् ।