काठमाडौँ — विश्वविद्यालय सभामा स्वतन्त्र विद्यार्थी युनियनका दुई सभापति मात्रै राखिने विद्यमान प्रणाली त्रुटिपूर्ण रहेको भन्दै त्रिचन्द्र क्याम्पसका स्ववियु सभापति गोविन्द कोइरालाले कुलपति एवं प्रधानमन्त्री केपी ओलीलाई पत्राचार गरेका छन् ।

अहिले विश्वविद्यालय सभामा दुई जना मात्रै स्ववियु सभापति राख्ने प्रचलन छ । तर ती दुईजना सभापति कसरी छनौट हुन्छन् र कसरी तिनीहरुले देशभरका सम्पूर्ण स्ववियु सभापतिको प्रतिनिधित्व गर्न सक्छन् भन्ने विषय स्पष्ट छैन । 

अध्यक्ष कोइरालाले विश्वविद्यालय सभामा प्रतिनिधित्व गर्ने दुईजनाको छनौट खुला प्रतिस्पर्धा वा कुनै विधिको निर्वाचनबाट हुनुपर्ने माग गरेका छन् । उनले त्रिवि विद्यार्थी कल्याण परिषद्मा हुने प्रतिनिधित्वको विषयमा पनि कुनै नियम, छनौट प्रणाली वा कार्यविधि नबनेको भन्दै यसलाइ सच्याउनुपर्ने बताएका छन् । 

विश्वविद्यालय सभामा हुने मनोनयनका विषयमा सभापति कोइरालाले त्रिवि सूचना महाशाखासँग जानकारी मागिएको तर यसबारे कुनै उत्तर नपाएको गुनासो पनि प्रधानमन्त्रीसमक्ष गरेका छन् । कुलपति ओलीलाई सम्बोधन गरिएको पत्रमा लेखिएको छ, 'त्रिवि सभामा प्रतिनिधित्व हुने जस्तो संवेदनशील कुरामा ‌औपचारिक तथा लोकतान्त्रिक प्रक्रियाको अभाव हुनु गैरजिम्मेवार एवं त्रासद् विषय हो ।'