म्याग्दी — विद्यार्थी भर्ना हुनै नआएपछि बेनी नगरपालिका अन्तर्गतका दुई वटा आधारभुत विद्यालय बन्द भएका छन्। बेनी नगरपालिका-५ गाजने स्थित जगन्थान आधारभुत विद्यालय र वडा नं. १० स्थित ओखले आधारभुत विद्यालय विद्यार्थी शुन्य भएपछि बन्द भएका हुन्।

विद्यार्थी शुन्य भएपछि यी विद्यालय बन्द गरिएको बेनी नगरपालिकाले जनाएको छ। यी विद्यालयमा गत शैक्षिक सत्रमा पनि कक्षा १–३ सम्म विद्यार्थी शुन्य भएपछि घटुवा गरी बालकक्षा मात्र संञ्चालनमा ल्याइएको थियो ।

यस वर्ष पूर्व आधारभुत तह बाल कक्षामा पनि कुनै विद्यार्थी भर्ना नभएपछि पूर्णरुपमा विद्यालय बन्द भएका हुन्। ‘जिल्लाको जन्मदर ऋणात्मक छ । त्यसमाथि अलिअलि आम्दानी हुनेहरु सहर झर्नक्रम बढेपछि गाउँका विद्यालय बन्द हुने क्रममा छन्। यो वर्ष दुई वटा बन्दै गर्‍यौं, अर्को वर्ष कति बन्द गर्नु पर्ने हो,’ बेनी नगरपालिकाका मेयर सुरत केसीले भने, ‘विगत १०–१५ वर्षको अभिलेख हेर्ने हो भने जन्मदर ऋणात्मक हुँदा त्यसको प्रत्यक्ष र पहिलो प्रभाव विद्यालयमा पर्न थालेको छ । विस्तारै कृषी, उद्योग र समग्र देशको जनशक्तिमा पर्ने देखिन्छ ।’