काठमाडौँ — प्यालेस्टिनी समूह हमासले करिब दुई दशकदेखि गाजामा आफ्नो नेतृत्वमा चलिरहेको सरकार विघटन गर्ने निर्णय गरेको छ ।

गाजाको सरकारी मिडिया कार्यालयद्वारा सोमबार जारी गरिएको विज्ञप्तिमा भनिएको छ, 'सरकारको आपतकालीन समितिका प्रमुख मोहम्मद अल-फराले आफ्नो पदबाट आधिकारिक राजीनामा दिने र सरकारी आपतकालीन समिति विघटन गर्ने निर्णय गरेका छन् । यो कदम सहमतिका व्यवस्थाहरू कार्यान्वयन गर्न र प्रशासनिक संक्रमण प्रक्रियालाई सहज बनाउन चालिएको हो ।'

 'हमासले नयाँ कदम चालेको छ, जसमा अब ऊ गाजा पट्टीको जिम्मेवारीमा रहने छैन । अब इजरायलले  आफ्नो आक्रामकता र विनाशकारी युद्ध जारी राख्‍न कुनै बहाना बनाउन पाउनेछैन,' हमासका प्रवक्ता हाजेम कासिमले एएफपी समाचार संस्थालाई भने । हमासको घोषणासँगै यस क्षेत्रमा विज्ञहरूको नेतृत्वमा नागरिक सरकार गठनका लागि बाटो खुला भएको छ । 

सोमबारको यो कदम हमासको एक महत्त्वपूर्ण राजनीतिक परिवर्तन हो । सन् २००६ को संसदीय चुनाव जितेपछि सन् २००७ देखि हमासले गाजामा शासन गर्दै आएको थियो । 

गत अक्टोबरमा अमेरिकाको मध्यस्थतामा गाजामा युद्धविराम लागू भएदेखि हमासले बारम्बार सरकार छाड्न तयार रहेको बताउँदै आएको थियो ।

उक्त सम्झौतामा हमासले सरकार र हतियार त्याग्‍ने उल्लेख थियो । त्यसपछि गाजामा संयुक्त राष्ट्रसंघ समर्थित नागरिक सरकार स्थापना गरिने र राष्ट्रसंघअन्तर्गतको अन्तर्राष्ट्रिय स्टेबिलाइजेशन फोर्स (आइएसएफ) ले गाजाको सुरक्षा गर्ने उल्लेख थियो । 

यस नागरिक सरकारलाई 'गाजा प्रशासनका लागि राष्ट्रिय समिति (एनसीएजी)'नाम दिइएको छ । १६ जनवरीमा एनसीएजी गठन भएपनि यसले अहिलेसम्म गाजामा सरकार सञ्चालन गर्न पाएको थिएन ।