काराकास — अमेरिकाबाट देश निकाला (डिपोर्ट) गरिएका १०० भन्दा बढी मानिसहरूलाई भेनेजुएलाको ला गुयरास्थित एउटा होटलमा ल्याएर राखिएको केही घण्टाभित्रै भूकम्प गएको थियो । भूकम्पमा उक्त होटल भग्नावशेषणमा परिणत भयो । 

अहिले धेरै मानिसहरु सम्पर्कविहिन छन् । घटनामा बाँच्‍न सफल भएकाहरुले अवस्था निकै कहालीलाग्दो रहेको बताएका छन् । 

भूकम्प जानुभन्दा केही घण्टाअघि अमेरिकाको मियामीबाट डिपोर्ट गरिएकाहरुलाई बोकेर एउटा विमान  भेनेजुएलामा अवतरण भएको थियो ।

अमेरिकी सरकारले देश निकाला गरेका मानिसहरुको तथ्यांङ्कबारे सर्वसाधारणलाई जानकारी दिने लक्ष्‍यले मानवअधिकारवादी संस्था ह्‍युमन राईट्स फर्स्टले सञ्चालन गरेको परियोजना आइस फ्लाईट मोनिटरका अनुसार उक्त उडानमा १९ जना महिला र सात जना बालबालिकासहित १४६ जना भेनेजुएलाका नागरिकहरू सवार थिए । 

घटनामा बाँच्न सफल ५८ वर्षीया लिस्बेथ पोर्टिलोले आफूहरुलाई भेनेजुएला फर्किएपछि सरकारले ला गुएरास्थित सान्तोआरियो ला लानादा नामक होटलमा राखेको बताइन् । यहाँ आएको छोटो समयमै भूकम्प गएको उनले स्मरण गरिन् ।  त्यसपछि झन्डै २० जना मानिसहरु भग्नावशेषबाट निस्किएर भागेको उनले बताइन् । 

भूकम्प जानुअघि उनीहरुलाई स्वास्थ्य परीक्षण गरेर परिचयपत्र दिइएको थियो र भोलिपल्ट घर पठाइने जानकारी दिइएको थियो ।

बुधबार गएको ७.२ र ७.५ रेक्टर स्केलको भूकम्पबाट सबैभन्दा बढी प्रभावित क्षेत्रहरूमध्ये ला गुएरा एक हो । यहाँका भवनहरूको भग्नावशेषबाट निस्कने क्रममा कतिपय मानिसहरू नाङ्गै त कतिपय खाली खुट्टा दौडिरहेको देखिन्थ्यो । 

'हामी करिब पाँच किलोमिटर पैदल हिड्यौँ, र म धुरुधुरु रोइरहेकी थिएँ । त्यहाँ सञ्चारको कुनै माध्यम थिएन,' पोर्टिलोले माराकाइबोस्थित आफ्नो घरबाट एशोसियट प्रेस (एपी)सँग टेलिफोनमा भनिन्, ' त्यसपछि हामी राष्ट्रिय गार्डको भवनमा पुग्यौं । जहाँबाट आफन्तहरूलाई फोन गर्ने मौका पाइयो ।'

'मेरो पुनर्जन्म भयो; भगवानले मलाई दोस्रो मौका दिनुभयो,' पोर्टिलोले केही बेर रोकिएर रुँदै उनले थपिन्, 'म मानसिक रूपमा धेरै मर्माहत भएकी छु ।' भेनेजुएला सरकारका अनुसार यस भूकम्पमा परी १,७०० भन्दा बढी मानिसको मृत्यु भएको छ । ठूलो संख्यामा मानिसहरु बेपत्ता छन् । 

अमेरिकी राष्ट्रपति डोनाल्ड ट्रम्पको धेरैभन्दा धेरै अवैध आप्रवासीहरुलाई देश निकाला गर्ने अभियानको चपेटामा पोर्टिलोसहितका भेनेजुएलाका नागरिक परेका थिए । पोर्टिलो अन्य १६ जना महिलाहरूसँगै दोस्रो तलाको एउटा कोठामा बसिरहेकी थिइन् । उनी समुद्र हेर्नका लागि बार्दलीमा निस्किन् र आकाश कालो देखिन् । त्यसपछि कोठामा फर्किएर केही समय बेडमा आराम गरिन् । अचानक उनले आफू हल्लिरहेको महसुस गर्न थालिन् ।

'मैले केही आवाज सुन्न थालेँ र मेरा छेउमा भएका महिलाहरू लड्न थालेको देखेँ,' भूकम्पको आवाज र क्षणको वर्णन गर्दै उनले भनिन्, 'उनीहरू सबैजना गुहार माग्दै चिच्याइरहेका थिए ।'

त्यसको लगत्तै, दोस्रो भूकम्प गयो । 'म लडेँ र एउटा बिममुनि पुरिएँ । तर भूकम्पको कम्पनले गर्दा म पुरिएको ठाउँका सामानहरू यताउता सरे र म बाहिर निस्कन सफल भएँ,' आफ्नो शरीरभरि चोटपटक र नीलडाम लागेकी पोर्टिलोले भनिन् ।

अमेरिकी अध्यागमन र भन्सार प्रवर्तनसँग यस विषयमा एपीले प्रश्न राख्दा तत्कालै कुनै प्रतिक्रिया दिन चाहेन । 

सामाजिक सञ्जालमा पोस्ट गरिएको भेनेजुएला सरकारको एउटा भिडियोमा बुधबार काराकास विमानस्थल आइपुगेका ती नागरिकहरूलाई भेनेजुएलाका अधिकारीहरूले स्वागत गरिरहेका दृश्यहरू देखाइएको थियो ।

२४ वर्षीया जेनी रोड्रिगेजले टेलिमुन्डो नेटवर्कसँगको कुराकानीमा आफू पनि उक्त उडानमा रहेको र होटलमा लगिएको कुरा बताइन् ।

'म भग्नावशेषमुनि फसेकी थिएँ । त्यही उडानमा सँगै रहेका एक साथी त्यहाँ आए । भग्नावशेषबाट आफ्नो हात बाहिर निकाल्न म सफल भएँ । उनको पाइन्टमा समातेँ र सहयोगका लागि बिन्ती गरेँ,' उनले भनिन्,'भगवानलाई र उनलाई धन्यवाद्, उनको सहयोगले म त्यहाँबाट बाहिर निस्कन सफल भएँ ।'

लिलियाना रोजासले टेलिमुन्डोसँगको कुराकानीमा आफ्ना ३३ वर्षीय जीवनसाथीलाई खोज्ने प्रयास गरिरहेको बताइन् । उनले यस विषयमा टेक्सासको एल पासोस्थित हिरासत केन्द्रसँग पनि सम्पर्क गरिन् । उनका जीवनसाथी देश निकाला हुनअघि यही केन्द्रमा थिए । तर, उक्त केन्द्रले देश निकाला गरिएपछिको अवस्थाबारे जानकारी नरहेको बतायो ।