काठमाडौँ — लाओसको एक गाउँमा भारी वर्षा र पहिरोका कारण एक हप्तादेखि गुफामा थुनिएका सातजनामध्ये पाँचजनालाई उद्धारकर्ताहरूले जीवितै उद्धार गरेका छन् । दुई जनाको खोजी कार्य चलिरहेको छ ।  

स्थानीय समयअनुसार बुधबार अपरान्ह १६ः३० बजे पाँचजनाको जीवितै उद्धार गरिएको हो । अधिकारीहरुका अनुसार लाओसको जायसोम्बुन प्रान्तका विभिन्न गाउँमा बस्ने स्थानीय गत साता बुधबार सुन खानी र कन्दमुलको खोजीका लागि गुफाभित्र पसेका थिए । तर, बाढीले गुफाको प्रवेशद्वार थुनिएपछि बाहिर निस्कन सकेनन् ।

लाओसको संस्था ‘रेस्क्यु भोलन्टियर फर पिपल’ का बुनखाम लुआङलाथले एसोसिएटेड प्रेसलाई बताएअनुसार बेपत्ता भएका दुई जनाको खोजी जारी छ । उनले झन्डै १ सय उद्धारकर्ताहरु खोजीका लागि खटिएको बताए । ‘म अझै पनि काँपिरहेको छु,’ एकजना उद्धारकर्ताले भने,‘हाम्रो टोलीले यो सम्भव तुल्यायो ।’

जमिनमुनि धेरै गहिराइसम्म फैलिएको यो गुफा अत्यन्तै साँघुरो छ । उद्धारकर्ताहरुका अनुसार केही ठाउँमा यहाँ  केवल २ इन्च चौडा स्पेस छ । फिनल्याण्डका विशेषज्ञ गोताखोर मिक्को पासी (जो थाइल्यान्ड बस्छन्) पनि यस मिशनमा संलग्न छन् ।

उनले बुधबार सबेरै यो उद्धार मिशन निकै कठिन रहेको बताएका थिए । ‘उद्धारकर्ताहरूले गुफाभित्र सयौँ मिटरको निरन्तर अवरोध, बाढीको पानी, भत्किने जोखिम र दूषित हावाको उच्च जोखिमको सामना गर्दै अघि बढ्नुपर्ने  आवश्यकता छ,’ उनले भनेका थिए, ‘यो एउटा परित्याग गरिएको सुनखानी हो ।’ 

उनको अनुमानअनुसार ती सात जना व्यक्तिहरू बाहिर निस्कने ढोकाबाट करिब ३०० मिटर (९८४ फिट) दूरीमा थुनिएका थिए । राजधानी भियनतिनबाट करिब १२० किलोमिटर (७५ माइल) उत्तरमा रहेको उक्त गुफामा गाउँलेहरू गत बुधबार पसेका थिए, सरकारी सञ्चारमाध्यमले जनाएका छन् ।