काठमाडौँ — इरानका विदेशमन्त्री अब्बास अराघची बुधबार बिहान एक कूटनीतिक प्रतिनिधिमण्डलसहित चीनको राजधानी बेइजिङ पुगेका छन्।

इरानी समाचार एजेन्सी तसनीम र फार्सका अनुसार विदेशमन्त्री अराघचीले चीनका विदेशमन्त्रीसँग कुराकानी गर्नेछन्।

इरानी मिडिया रिपोर्टअनुसार यस भ्रमणको उद्देश्य दुई देशबीचको द्विपक्षीय सम्बन्ध, क्षेत्रीय तथा विश्वस्तरमा भएका घटनाक्रमबारे छलफल गर्नु रहेको छ।

एसोसिएटेड प्रेसका अनुसार अमेरिका र इजरायलतर्फबाट इरानमाथि युद्ध सुरु भएपछि इरानी विदेशमन्त्रीको यो पहिलो चीन भ्रमण हो।

चीन इरानको प्रमुख व्यापारिक साझेदार तथा इरानी तेलको ठूलो खरिदकर्ता हो। इरानमाथि अमेरिकी प्रतिबन्धका बावजुद चीनले इरानी तेल खरिद जारी राखेको छ।

अराघचीको यो भ्रमण यस्तो महत्वपूर्ण समयमा भइरहेको छ, जब अमेरिकी राष्ट्रपति डोनाल्ड ट्रम्पले मे १४ र १५ मा चिनियाँ राष्ट्रपति सी चिनफिङसँग भेट गर्न चीन भ्रमण गर्ने कार्यक्रम रहेको छ।