भाजपाका लोकसभा सांसद राजु विष्टले तीनै क्षेत्रमा पार्टीको जितलाई ‘जनताको जित’ भन्दै टिप्पणी गरेका छन् । उनले भनेका छन्,‘यो जित गोर्खा समुदायको जित हो ।’ 

यस पटकको परिणामले दार्जिलिङ पहाडी क्षेत्रमा राजनीतिक शक्ति सन्तुलन फेरिएको छ । अघिल्ला निर्वाचनहरूमा क्षेत्रीय दलहरू मूलतः भारतीय गोर्खा प्रजातान्त्रिक मोर्चा प्रभावशाली देखिए पनि यसपटक भाजपाले त्यो शक्तिलाई पछि पारेको छ । 

भाजपाले चुनावी अभियानमा गोर्खा समुदायका दीर्घकालीन मागलाई प्राथमिकतामा राखेको थियो । प्रधानमन्त्री नरेन्द्र मोदी र गृहमन्त्री अमित शाहलगायत शीर्ष नेताहरूले पनि गोर्खा समुदायलाई सम्बोधन गर्दै अधिकार सुनिश्चित गर्ने आश्वासन दिएका थिए । यसको प्रत्यक्ष प्रभाव गोर्खा समुदायका मतदातामा परेको देखिन्छ । 

दार्जिलिङमा संवेदनशील मुद्दा मानिएको गोर्खाल्याण्डको माग लामो समयदेखि उठ्दै आएको छ । यसलाई सम्बोधन गर्ने प्रतिबद्धताले भाजपातर्फ झुकाव बढाएको विश्लेषकहरू बताउँछन् । ‘मूलतः त्यही कारणले भाजपाले मत पाएको देखिन्छ,’ दार्जिलिङका साहित्यकार तथा प्राध्यापक ज्ञानेन्द्र यक्सो भन्छन्, ‘यद्यपि, चुनावी वाचा कार्यान्वयन कति हुन्छ त्यो हेर्न बाँकी छ ।’ 

पश्चिम बंगाल विधानसभाका २ सय ९४ सिटमध्ये बहुमतका लागि १ सय ४८ सिट आवश्यक पर्छ । प्रारम्भिक नतिजा अनुसार भाजपा करिब २ सय सिटमा अगाडि देखिएको छ । जसले करिब १५ वर्षदेखि एकछत्र राज गर्दै आएको पश्चिम बंगालको राजनीतिक समीकरण फेरिने पक्का भएको छ । त्रिणमूल कांग्रेस करिब ४ दशक लामो कम्युनिस्ट शासनलाई सत्ताच्युत गर्दै उदाएको थियो ।