काठमाडौँ — अस्ट्रियामा शिशुका लागि बनाइएको खानेकुरामा मुसा मार्ने विष भेटिएपछि व्यापक सतर्कता अपनाइएको छ । साथै, उत्पादन कम्पनीले सम्बन्धित उत्पादनहरू बजारबाट फिर्ता लिन थालेको छ । प्रहरीले शनिबार सार्वजनिक गरेको जानकारीअनुसार प्रारम्भिक परीक्षणका क्रममा आहार राखेको भाडोमा खतरनाक पदार्थ पुष्टि भएपछि यसलाई गम्भीर सुरक्षा चुनौतीका रूपमा लिइएको छ ।

अस्ट्रियाली प्रहरीका अनुसार जफत गरिएका नमूनाहरू परीक्षण गर्दा मुसा मार्ने विष पुष्टि भएको हो । यो घटनालाई लक्षित छेडछाडको आशंकसँग जोडेर अनुसन्धान भइरहेको छ । जर्मनीमा मुख्यालय रहेको एचआइपीपी ब्रान्डले यसअघि नै आफ्नो ‘आलुसहित गाजर’ प्युरीमा सम्भावित छेडछाड भएको भन्दै अस्ट्रियाको एसपीएआर सुपरमार्केटबाट बिक्री भएका उत्पादनहरू फिर्ता ल्याउने निर्णय गरेको थियो ।

यो अनुसन्धान जर्मनीमा सुरु गरिएको व्यापक कारबाहीको एक हिस्सा हो, जसअन्तर्गत अस्ट्रिया, चेक गणतन्त्र र स्लोभाकियामा पनि उक्त उत्पादन जफत गरिएको छ । अस्ट्रियाको पूर्वी बर्गेनल्यान्ड प्रान्तस्थित प्रहरीले यो जानकारी सार्वजनिक गर्दै परीक्षणबाट खतरनाक विषादीको पुष्टि भएको जनाएको छ ।

अस्ट्रियाको खाद्य सुरक्षा निकायले यो घटनालाई सम्भावित फिरौती योजनासँग जोडेर हेरेको छ, जसले शिशु आहार जस्तो संवेदनशील क्षेत्रमा आपराधिक गतिविधिको संकेत दिएको छ । अधिकारीहरूले उपभोक्ताहरूलाई उक्त उत्पादन प्रयोग नगर्न र तत्काल खरिद गरिएकै स्थानमा फिर्ता गर्न आग्रह गरेका छन् । 

यस घटनाले युरोपमा शिशु खाद्य सुरक्षाबारे बढ्दो चिन्तालाई थप गहिरो बनाएको छ । पछिल्ला महिनाहरूमा पनि विभिन्न बहुराष्ट्रिय कम्पनीहरूले शिशु आहारमा प्रदूषणको आशंका गर्दै उत्पादनहरू फिर्ता बोलाउने घटना भएका छन् । विशेषगरी डिसेम्बरदेखि नेस्टले, डेनोन र ल्याक्टालिसजस्ता कम्पनीहरूले ६० भन्दा बढी देशहरूमा सम्भावित रूपमा टोक्सिन सेरुलाइडबाट दूषित शिशु फार्मुला बजारबाट हटाएका थिए ।

फ्रान्सेली अधिकारीहरूका अनुसार सेरुलाइडबाट प्रभावित पाउडर दूध सेवन गरेका केही शिशुहरूमा गम्भीर स्वास्थ्य समस्या देखिएको थियो, जसमा वाकवाकी लाग्ने र झाडापखाला जस्ता लक्षण देखिएका थिए ।  केही घटनामा मृत्यु समेत भएको रिपोर्ट गरिएको थियो । यद्यपि, फ्रान्सेली अभियोजकहरूले जनवरीमा भएको एक शिशुको मृत्यु उक्त दूषित फार्मुलासँग प्रत्यक्ष रूपमा सम्बन्धित नभएको बताएका छन् ।