काठमाडौँ — अमेरिकी राष्ट्रपति डोनाल्ड ट्रम्पको धम्कीपछि इरानले देशभरका युवाहरुलाई एकजुट हुन र आफ्नो समर्थन दिन अपील गरेको छ । 

अन्तर्राष्ट्रिय सञ्चार माध्यम अलजजीराको रिपोर्ट अनुसार इरानी सरकारले कैयौं विश्वविद्यालयका विद्यार्थी, कलाकार, खेलाडी र युवा संगठनहरुलाई मंगलबार पावर प्लान्ट आसपास मानव श्रृंखला  बनाएर उभिन अपील गरिएको छ । 

यसको उद्देश्य सार्वजनिक संरचनामा अमेरिकी आक्रमणको विरोध गर्नु रहेको बताइएको छ । यसअघि ट्रम्पले इरानलाई हर्मुज खोल्न र युद्धविरामका लागि ४८ घण्टाको अविधि दिएका थिए । उक्त समय मंगलबार (पूर्वीय समयअनुसार) राति ८ बजे सकिँदैछ । नेपाली समयअनुसार बुधबार बिहान ५:४५ मा सकिनेछ ।

ट्रम्पले सोमबार इरानलाई एकै रातमा नष्ट गर्नसक्ने र त्यो मंगलबार नै हुनसक्ने चेतावनी दिएका थिए । सञ्चार माध्यमसँग कुरा गर्दै उनले भने, ‘हामीसँग एउटा योजना छ । इरानमा मंगलबार राति हरेक पुल नष्ट गरिनेछ । हरेक पावर प्लान्ट बिजनेसभन्दा बाहिर हुन्छन् । उनीहरु त्यसलाई कहिले प्रयोग गर्न लायक नै बच्ने छैनन् र यो सबै मात्र ४ घण्टामा हुनसक्नेछ ।’ 

यता इजरायलले सोमबार इरानको बुशहर नेभी बेसमा आक्रमण गरेको छ । यहाँ नेभल बेसका साथै एयरफोर्स बेस, एयर डिफेन्स सिस्टम, मिसाइल र ड्रोनको अन्डरग्राउन्ड स्टोर रहेको बताइएको छ । सोमबार नै इरानले पनि इजरायलको पेटाह टिकवा सहरमा मिसाइल आक्रमण गरेको छ । उक्त आक्रमणमा एक महिला गम्भीर घाइते भएको इजरायली सञ्चार माध्यमले जनाएका छन् ।