काठमाडौँ — इरानले इराकी जहाजहरू हर्मुजको जलघाँटी पार गर्न स्वतन्त्र रहेको घोषणा गरेको छ । इरानको खातम अल–अन्बिया केन्द्रीय मुख्यालयले शनिबार एक विज्ञप्तिमार्फत इराकको सार्वभौमसत्तालाई सधैं सम्मान गर्ने बतायो ।

'हामी इराकको राष्ट्रिय सार्वभौमिकताप्रति गहिरो सम्मान गर्छौं,' अर्ध–सरकारी तस्निम समाचार एजेन्सीले सैनिक मुख्यालयलाई उद्रृत गर्दै भनेको छ, 'तपाईं अमेरिकी कब्जाको घाउ बोकेको राष्ट्र हुनुहुन्छ । अमेरिकाविरुद्धको तपाईहरुको संघर्ष प्रशंसाको योग्य छ ।'

अमेरिकी राष्ट्रपति डोनाल्ड ट्रम्पले शनिबार तेहरानलाई सम्झौता गर्न वा जलघाँटीको नियन्त्रण त्याग्नका लागि ४८ घण्टाको समय दिइएको बताएका थिए ।  उनले सामाजिक सञ्जाल ट्रुथमा यस्तो चेतावनी दिएका हुन् । ४८ घण्टा भित्र जलघाँटी नखोले इरानलाई नर्क बताइदिने उनको चेतावनी छ ।

इरानको खातम अल–अन्बिया केन्द्रीय मुख्यालयले ट्रम्पको मागलाई अस्वीकार गरेको छ । उनको धम्की कारयतापूर्ण र मुर्ख रहेको सैन्य मुख्यालयले जनाएको छ ।

अमेरिका र इजरायलले फेब्रुअरी २८ मा इरानमाथि  युद्ध सुरु गरेदेखि नै हर्मुजमा अवरोध छ । यस जलघाँटी हुँदै विश्वको झन्डै २० प्रतिशत  तेल र तरल प्राकृतिक ग्यास (एलएनजी) ग्यास बाहिरिन्छ ।

भर्खरै इरानले इजरायल–अमेरिका र उसका सहयोगी देशबाहेक अन्य देशलाई हर्मुजबाट बाहिरिन दिने घोषणा गरेको छ । तर, यसका लागि रिभोलुशनरी गार्ड्स कप्र्ससँग अनुमति लिनुपर्छ ।

इरानले यस जलघाँटीबाट बाहिरिने जहाजसँग टोल ट्याक्स उठाउने निर्णय पनि गरेको छ  । संसदीय सुरक्षा समितिबाट यो निर्णय पारित भइसकेको छ ।