फ्लाइट राडर २४ का अनुसार दमकललाई ठक्कर दिँदा यो विमानको गति ३९ किलोमिटर प्रतिघण्टा थियो ।
काठमाडौँ — क्यानाडाको मोन्ट्रियलबाट आइरहेको एयर क्यानाडा एक्सप्रेस फ्लाइट ८६४६ ले न्युर्योकको ला गार्डिया विमानस्थलमा दमकललाई ठक्कर दिएको छ ।
सीआरजे ९०० मोडेलको यस विमानमा ७० देखि ९० जना सवार भएको बताइएको छ । केही यात्रु घाइते भएका छन् ।
यस घटनापछि विमानस्थल तत्कालका लागि बन्द गरिएको छ । न्युर्योक प्रहरीले एएफपी न्युज एजेन्सीसँग विमानस्थलमा रहेका गाडीसँग विमान ठोक्किएको बताए ।
त्यस्तै दमकल विभागले विज्ञप्ति जारी गर्दै रन वे फोरमा विमान र दमकल ठोक्किएको खबर प्राप्त भएको जनायो ।
फ्लाइट राडर २४ का अनुसार दमकललाई ठक्कर दिँदा यो विमानको गति ३९ किलोमिटर प्रतिघण्टा थियो । यस विमानलाई जाज एभियसनले सञ्चालन गर्छ ।
सामाजिक सञ्जालमा फैलिएका तस्विरहरुमा प्लेनको टुप्पोमै क्षति पुगेको देखिन्छ ।
