विद्यालय, विश्वविद्यालय, सरकारी कार्यालयलगायत क्षेत्र अब बुधबार बन्द हुनेछन् ।
काठमाडौँ — श्रीलंकाले इन्धन बचत गर्नका लागि बुधबार सार्वजनिक बिदा दिने भएको छ । शनिबार र आइतबार श्रीलंकामा नियमित रुपमा सार्वजनिक छुट्टी हुन्छ ।
लगातार तीन दिन सरकारी काम नरोकियोस् भने बुधबार बिदा दिइएको सरकारले जनाएको छ । विशेष परिस्थिति आइपरेका कारण बुधबार बिदा दिनुपरेको राष्ट्रपति अनुरा कुमारा दिसानायकेले बताएका छन् ।
विद्यालय, विश्वविद्यालय, सरकारी कार्यालयलगायत क्षेत्र अब बुधबार बन्द हुनेछन् । ‘हामीले सबैभन्दा खराब अवस्थाको लागि तयारी गर्नुपर्छ, तर उत्तम परिस्थितिकोे आशा गर्नुपर्छ,’ राष्ट्रपति दिसानायकेले सोमबार वरिष्ठ अधिकारीहरूसँगको आपतकालीन बैठकमा भने ।
यहाँ निजी कारहरुका लगि मासिक १५ लिटर र मोटरसाइकलका लागि ५ लिटरमात्रै तेल किन्न पाइने व्यवस्था गरिएको छ ।
हर्मुजको जलघाँटीमा इरानले अवरोध गरेपछि एशियाली देशहरुमा इन्धनको अभाव देखिएको छ । श्रीलंकामा आयात हुने तेलको कच्चा पदार्थमध्ये ८० प्रतिशत हाराहारी मध्य एशियाली देशहरुबाट हर्मुजको जलघाँटी हुँदै आउँछ । पश्चिम एसियामा देखिएको संकटले श्रीलंकामा खाने पकाउने ग्याँस (एलपीजी) पनि अभाव भएको छ ।
इन्धनको विश्वव्यापी मूल्यवृद्धि र अभावपछि श्रीलंकाको अर्थतन्त्रमा नराम्रो असर देखिएको छ ।
विश्वको झन्डै २० प्रतिशत कच्चा तेल आपुर्ति हुने महत्वपूर्ण रुट हर्मुज जलघाँटीमा देखिएको अवरोधले एशियाका मुलुकहरु समस्यामा छन् ।
थाइल्याण्डमा सरकारले एयर कन्डिसनिङमा निर्भरता कम गर्न मानिसहरूलाई छोटो बाहुला भएको टिसर्ट लगाउन आग्रह गरेको छ ।
म्यानमारमा निजी सवारी जोर–बिजोर प्रणालीमा सञ्चालन हुने नियम लागु गरिएको छ । बंगलादेश पाकिस्तानमा पनि विश्वविद्यालय र विद्यालय बन्द छन् । सरकारी कर्मचारीलाई घरबाटै काम गर्ने अनदुमति दिइएको छ ।
फिलिपिन्समा केही सरकारी कार्यालयहरूले कर्मचारीहरूलाई हप्तामा कम्तिमा एक दिन घरबाट काम गर्न अनिवार्य गरेका छन् ।
भियतनामले नागरिकहरूलाई अत्यावश्यक कामबाहेक बाहिर ननिस्कन आग्रह गरेको छ । साइकल चलाउन, लिफ्ट दिन र सार्वजनिक यातायतको अत्यधिक प्रयोग गर्न आग्रह गरिएको छ ।
