अमेरिकी मध्यस्थतामा युद्धरत मुलुकका प्रतिनिधिबीच धेरै चरणका छलफलहरू भए पनि सम्झौता गर्न असफल भएका छन्
What you should know
काठमाडौँ — रसियाका विदेशमन्त्री सर्गेई लाभरोभले युक्रेन युद्ध अन्त्य गर्न कुनै सम्झौता गर्न हतार नभएको बताएका छन् । बिहीबार रूसी सरकारी सञ्चारमाध्यमसँग कुराकानी गर्दै उनले यस्तो बताएका हुन् ।
अमेरिकी राष्ट्रपति डोनाल्ड ट्रम्पले जारी द्वन्द्व अन्त्य गर्ने प्रयास अघि सारेपछि दुवै देशका वार्ताकारहरू बिहीबार जेनेभा पुगेका छन् । अमेरिकी मध्यस्थतामा युद्धरत मुलुकका प्रतिनिधिबीच धेरै चरणका छलफलहरू भए पनि सम्झौता गर्न असफल भएका छन्, मस्कोले कट्टरपन्थी क्षेत्रीय र राजनीतिक मागहरूमा जोड दिएको छ जसलाई किएभले आत्मसमर्पण हुने भन्दै अस्वीकार गरेको छ । रुसका उच्च अधिकारीहरूले बिहीबार फेरि सम्झौता नजिकिँदै गरेको भन्ने भनाइलाई खण्डन गरेका छन् ।
'के तपाईंले हामीबाट समयसीमाको बारेमा केही सुन्नुभएको छ ? हामीसँग कुनै समयसीमा छैन, हामीसँग प्रक्रियागत कार्यहरू छन् र तिनीहरूलाई पूरा गर्ने काम भइरहेको छ,' राष्ट्रिय समाचार संस्थाहरूले लाभरोभलाई उद्धृत गर्दै भनेका छन् ।
क्रेमलिनका प्रवक्ता दिमित्री पेस्कोभले पनि शान्ति प्रक्रिया कुन चरणमा छ भनेर पूर्वानुमान गर्न हतार नभएको बताए । उनले सञ्चारमाध्यमसँग भने, 'कुनै प्रकारको चरण परिभाषित गर्न वा पूर्वानुमान गर्न अहिले नै प्रयास गर्नु ठूलो गल्ती हुनेछ । म ती गल्तीहरू गर्न चाहन्न ।'
युक्रेनका राष्ट्रपति भोलोदिमिर जेलेन्स्कीले रूसी नेता भ्लादिमिर पुटिनसँग प्रत्यक्ष बैठक आवश्यक भएको बताउँदै आएका छन् । रूसले कब्जामा लिएको पूर्वी युक्रेनको क्षेत्र रूसमा गाँभिनुपर्ने रूसको अडान जारी छ भने युक्रेनले आफ्नो भूमि रूसलाई दिनु उसलाई भविष्यमा थप आक्रमण गर्न हौसला दिनु भएको भन्दै यस विषयमा अस्विकृति जनाउँदै आएको छ ।
पेस्कोभले बिहीबार पनि भने, 'रुस वार्ता निष्कर्षमा पुग्ने सुनिश्चितता नहुँदासम्म शिखर वार्ताका लागि सहमत हुने छैन र वार्ता टोलीहरूबीच भएको सम्झौतामा हस्ताक्षर मात्र हुनेछ ।'
