काठमाडौँ — इरानी राष्ट्रपति मासुद पेजेश्कियनले संयुक्त राज्य अमेरिकासँग जारी आणविक वार्ताबाट ‘उत्साहजनक संकेत’ प्राप्त भएको बताएका छन् । त्यस्तै, उनले सबै सम्भावित परिदृश्यको सामना गर्न ईरान तयार रहेको बताएका छन् । 

पेजेश्कियनका अनुसार पछिल्ला वैठकहरूमा आणविक कार्यक्रमलाई लिएर व्यवहारिक प्रस्तावहरू आदान–प्रदान भएका छन् । त्यहीकारण आज हुने वार्ता अर्थपूर्ण रहेको उनले बताएका छन् । 

ओमानका विदेश मन्त्री बद्र अल–बुसाइदीले आज जेनेभामा इरान–अमेरिकाबीच तेस्रो चरणको अप्रत्यक्ष वार्ता हुने औपचारिक पुष्टि गरेका छन् ।

वार्तामा मध्यस्थको भूमिकामा रहेका अल–बुसाइदीले सहमतिको अन्तिम चरणसम्म पुग्न अतिरिक्त प्रयास गर्ने सकारात्मक माहोल बनेको दाबी गरेका छन् ।

पछिल्लोपटक गत शुक्रबार जेनेभामा दोस्रो चरणको वार्ता भएपनि कुनै ब्रेक थ्रु जुट्न सकेको थिएन ।