काठमाडौँ — क्युबाको सेनाको गोली प्रहारबाट ४ जनाको मृत्यु भएको छ । आफ्नो जलक्षेत्रमा प्रवेश गरेर सैनिकमाथि गोली चलाउने अमेरिकी डुंगामाथि जवाफी कारबाही गर्दा ४ को मृत्यु ६ जना घाइते भएको सेनाले जनाएको छ । उक्त डुंगा अमेरिकाको फ्लोरिडा राज्यमा दर्ता भएको पाइएको छ । 

घटनामा क्युवाका एक सैनिक घाइते भएका छन् । सेनाले मृतक तथा घाइते अमेरिकामा बस्ने क्युवेली नागरिक रहेको दाबी गरेको छ । तर, उक्त डुंगा किन क्युवातर्फ गइरहेको थियो भन्ने स्पष्ट छैन । 

अमेरिकी विदेशमन्त्री मार्को रुबियोले मृतक र घाइते अमेरिकाका स्थायी बासिन्दा वा नागरिक भए/नभएको विषयमा जानकारी संकलन भइरहेको बताए । उनले घटनाबारे अमेरिकाले आफैं अनुसन्धान गर्ने बताए । 

‘खुला समुद्रमा त्यस्ता दोहोरो गोली हानाहान देख्नु अत्यन्तै असामान्य हो । यस्तो दिनहुँ हुँदैन,’ उनले भने ।

फ्लोरिडाका न्यायाधिवक्ता जेम्स उथमायरले संघीय, राज्य र स्थानीय निकायसँग समन्वय गरेर घटनाबारे छानबिन सुरु गर्न सरकारी अधिकारीहरुलाई निर्देशन दिइएको बताए ।

‘क्युवाको सरकार विश्वास गर्न लायक छैन । यी कम्युनिस्टलाई जवाफदेही बनाउने काममा हामीले आफ्नो सम्पूर्ण शक्ति प्रयोग गर्नेछौँ,’  उनले सामाजिक सञ्जाल एक्समा लेखेका छन् ।