काठमाडौँ — अमेरिकाको सर्वोच्च अदालतले आपतकालीन भन्सार शुल्क खारेज गर्न आदेश दिएपछि राष्ट्रपति डोनाल्ड ट्रम्पले अदालतको कडा आलोचना गरेका छन् । उनले अन्य कानुनमार्फत कर कायम राख्ने दाबी पनि गरेका छन्।​

अन्तर्राष्ट्रिय आपतकालीन आर्थिक शक्ति ऐन प्रयोग गरेर कङ्ग्रेसको सहमति बिना आयात कर लगाउन नमिल्ने सर्वोच्चको ठहर छ । शान्तिकालमा कर लगाउने अधिकार कङ्ग्रेसकै भएको ठहर अदालतले गरेको छ ।

तर ट्रम्पले यसको विरोध गरेका छन् । उनले पत्रकार सम्मेलन गर्दै सर्वोच्च अदालत 'विदेशी स्वार्थबाट प्रभावित' भएको दाबी गरे । त्यस्तै, यस शुल्कको साटो विश्वव्यापी रूपमा १० प्रतिशत नयाँ भन्सार शुल्क लागु हुने पनि उनले बताए । १९६२ को व्यापार बिस्तार ऐन प्रयोग गरेर यो शुल्क लगाइएको उनले बताए । 

अक्सफोर्ड इकोनोमिक्सले शुक्रबारको निर्णय ट्रम्पको आर्थिक एजेन्डाको लागि ठूलो धक्का रहेको आँकलन गरेको छ । किनकी, ट्रम्पल प्रशासनले भन्सार शुल्क बढाएर २०२६ देखि २०३५ सम्म लगभग ३.६ ट्रिलियन डलर राजस्व उठाउने अपेक्षा राखेको थियो ।

तर अमेरिकी राष्ट्रपतिले अन्य नियम र कानुन प्रयोग गरेर भन्सार शुल्क वृद्धि कायमै राख्‍ने दाबी गरेका छन् ।