जमात्का नेताहरुले कुनै झडप नभएको दाबी गरेका छन् । उनीहरुले कोची आफैं बिरामी परेर ढलेको बताएका छन् ।
काठमाडौँ — बंगलादेशको खुल्नास्थित एक मतदान केन्द्रमा बंगलादेश राष्ट्रिय पार्टी (बीएनपी) का नेता मोहीबुज्जामन कोचीको निधन भएको छ ।
बिहान ९ बजेतिर उनी खुल्ना अलिया मदरसा मतदान केन्द्रमा पुगेका थिए । ६० वर्षीय कोची बीएनपीको खुल्ना महानगरका पूर्व कार्यालय सचिव हुन् ।
मतदान केन्द्रभित्र मत प्रभावित गर्ने प्रयास जमात्–ई ईस्लामीले गरेपछि कोचीले त्यसको विरोध गरेको बीनएनपीको दाबी छ । बीएनपीका स्थानीय कर्ताकर्ता युसुफ हारुन मञ्जुले बिहानैदेखि मतदान स्थल तनावमय रहेको बताए ।
अलिया मदरसा प्रमुख तथा जमात्का कार्यकर्ता अब्दूल रहिमले धकेलेपछि रुखमा ठोक्किएर कोचीको टाउकोमा चोट लागेको हारुनको आरोप छ ।
यसपछि नजिकैको निजी मेडिकल कलेजमा मोहीबुज्जानलाई लगिएको थियो । जहाँ चिकित्सकले उनलाई मृत घोषणा गरे । यस विषयमा रहिमले कुनै प्रतिक्रिया दिएका छैनन् ।
जमात्का नेताहरुले भने कुनै झडप नभएको दाबी गरेका छन् । उनीहरुले कोची आफैं बिरामी परेर ढलेको बताएका छन् । प्रहरीले घटनास्थलमा पुगेर तनाव नियन्त्रण गरेको थियो ।
प्रोथोम आलोसँगको कुराकानीमा बीएनपीका महानगरीय प्रवक्ता मिजानुर रहमानले कोची लामो समयदेखि हृदयघातको बिरामी रहेको बताए ।
बीएनपीका खुल्ना–२ निर्वाचन क्षेत्रबाट बीएनपीको उम्मेदवार रहेका जनरुल इस्लामले कोचीमाथि आक्रमण भएको भन्दै निन्दा गरेका छन् । उनले घटनामा संलग्न मदरसा प्रमुख रहिमलाई तत्कालै पक्राउ गर्न माग गरे ।
