काठमाडौँ — प्यालेस्टाइनको गाजापट्टीलाई इजिप्टसँग जोड्ने एकमात्रै सीमा नाका राफा सोमबारबाट सञ्चालनमा आएको छ । अमेरिकी सञ्चारमाध्यम सीएनएनले इजरायली सुरक्षाकर्मीलाई उद्रृत गर्दै यसको पुष्टि गरेको हो । 

झन्डै एक वर्षपछि यो नाका सञ्चालनमा आएको हो ।  यसअघि गत वर्ष जनवरीमा हमास र इजरायलबीच भएको युद्धविराम सम्झौतापछि छोटो समय नाका सञ्चालनमा आएको थियो । तर युद्धविराम भंग भएसँगै मार्चमा फेरि बन्द भयो । 

अक्टुबर, २०२३ मा हमासले इजरायलमाथि आक्रमण गरेपछि युद्ध सुरु भएको थियो । त्यसयता, अधिकांश समय यो नाका इजरायलले बन्द गरेको छ । 

आइतबार नाका खोल्नुअघि प्यालेस्टिनी अथोरिटी तथा युरोपेली युनियनका पर्यवेक्षकको स्टेशन रहेको ठाउँमा सिस्टम चेक तथा विभिन्न परीक्षण गरिएको थियो । यो नाका पैदलयात्रीहरुका लागि मात्रै खुलेको हो । उद्धार तथा सहयोग सामाग्री बोेकेका ट्रकहरु अझै पनि यहाँबाट आवत–जावत गर्न पाउने छैनन् ।

गाजाबाट दैनिक १ सय ५० जना मानिस बाहिरिन पाउनेछन् । उनीहरुले प्यालेस्टिनी अथोरिटीसँग स्विकृति लिनुपर्नेछ । उता, इजिप्टबाट दैनिक ५० जनामात्रै गाजा छिर्न पाउनेछन् । 

यो नाका बन्द हुँदा प्यालेस्टाइनमा रहेका घाइते र बिरामीहरु उपचारका लागि निस्कन पनि पाएका थिएनन् । गाजाको स्वास्थ्य मन्त्रालयले गत साता २० हजार मानिसहरु उपचाका लागि विदेशमा यात्रा गर्न प्रतिक्षारत रहेको जनाएको थियो । उनीहरुसँगै कम्तिमा एकजना आफन्त वा हेरचाहमा सक्रिय व्यक्ति पनि उपचारका लागि जानेछन् ।

यो नाका बन्द भए पनि बिरामीहरुलाई बाहिर ल्याउने कार्यमा विश्व स्वास्थ्य संगठन (डब्ल्युएचओ) र अन्य संस्थाहरुले सहजीकरण गरिरहेका थिए । युद्ध अवधिभर उपचारका लागि झन्डै ७ हजार ६ सय बिरामीलाई यसरी उपचारका लागि बाहिर पठाइएको थियो ।