अमेरिका — अमेरिकामा लगातार चार दिनसम्म भारी हिमपात, आँधी, हिमबर्षाका कारण ठूलो आर्थिक र मानवीय क्षति भएको छ । स्थानीय समयअनुसार जनवरी २३, २४, २५ र २६ मा लगातर अमेरिकाका ५० मध्ये ३० राज्यमा भारी हिमपात, आँधी, हिमबर्षाका कारण जनजीवन प्रभावितसँगै ठूलो आर्थिक र मानवीय क्षती भएको हो ।

चार दिनसम्म लगातार ३० राज्यमा हिउँदे मौमस खराबका कारण हजारौं उडान रद्द, ठूला व्यापारिक कम्पनी ठप्प र जनजीवन प्रभावसँगै आर्थिक गतिविधिसमेत न्यून भएकोले अर्बौं अमेरिकी डलर क्षती भएको अमेरिकी आर्थिक विशेषज्ञहरुले प्रारम्भीक अनुमान गरेका छन् ।

अमेरिकाको बर्षिक जीडिपी ३० ट्रिलियन (३ सय खर्ब) अमेरिकी डलर रहेको छ । यो बार्षिक जीडीपीमा यस वर्षको हिउँदे मौसमले ठूलो प्रभाव पार्ने अमेरिकी अर्थशास्त्रीहरुले अनुमान गरेको अमेरिकी समाचार संस्था एशोसिएटेड प्रेस (एपी)ले उल्लेख गरेको छ । एपीका अनुसार चार दिनमा २४ हजार ६ सय ५४ उडान रद्द हुँदा १ सय १५ विलियन (१ सय १५ अर्ब ) अमेरिकी डलर नोक्सान भएको छ । जलवायु अर्थशास्त्री एडम स्मिथले करोडौं जनताको जनजीवन प्रभाव पार्ने खराब मौसमले २०२६ को देशका लागि पहिलो अर्बैं डलरको मौसम प्रकोप हुने दाबी गरेका छन् । ‘अर्बौं अमेरिकी डलरको नोक्सानलाई तत्काल मेटाउन सकिँदैन,’ उनले भने ।

यसैगरी अघिल्लो वर्ष क्यालिफोर्नियाको लस एन्जलसमा आगलागीबाट २ सय ५० विलियन (२ सय ५० अर्ब) अमेरिकी डलर क्षति भएको थियो । त्यो क्षतिलाई यसवर्ष हिउँदे मौमसको प्रभावमा तुलना गर्दै अमेरिकी आर्थिक विशेषज्ञहरुले प्राइभेट ठूला उद्योग र कम्पनीहरु ३० वटा राज्यमै ठप्प हुँदा अर्को करिब २ सय ५० अर्ब नै क्षतिको विवरण आउनसक्ने बताएका छन् ।

जलवायु अर्थशास्त्री स्मिथले ३० वटा राज्यमा हिउँदे खराब मौसमका कारण देखिएको प्रभाव र गतवर्ष क्यालिफोर्नियाको लस एन्जलसमा भएको आगलागीको क्षतिको तुलना लगभग उस्तै देखिएकोले प्रारम्भिक अनुमान मात्र भएको दाबी गरेका छन् । ‘यो प्रारम्भिक अनुमान हो, थप बिमाबाट क्षतिको जोखिम न्यूनीकरण ६० बिलियन डलर बिमाबाट हुने अध्ययन गर्न सकिन्छ,’ स्मिथले एपीसँग भनेका छन् ।

प्रारम्भिक घटना विवरणको आधारमा हिमपात, आँधी र हिमवर्षाका कारण हालसम्म कम्तिमा ३० जनाको मृत्यु भएको छ । हिमपातको अधिक प्रभावमा रहेका ३० वटा राज्यमध्ये कहाँ कति जनाको मृत्युबारे यकीन विवरण भने सार्वजनिक गरिएको छैन । राज्यअनुसार यकीन विवरण सार्वजनिक नगरिए पनि सवारी दुर्घटना कारण, अधिक चिसोका कारण घरबारविहिनहरु, हिउँ पन्छाउने क्रममा भएका दुर्घटना र हिउँमा स्केटिङ गर्ने क्रममा भएका दुर्घटनाका कारण कम्तिमा ३० जनाको मृत्यु भएको मौसमविद् जोनथन पोर्टरले जानकारी दिएको एपीले उल्लेख गरेको छ ।

चार दिनसम्मको खराब हिउँदे मौसमकै कारण करिब १० लाख बढी अमेरिकी बासिन्दा अन्धकारमा दैनिकी बिताउन बाध्य भएको जनाएको छ । हिमपात, आँधी र हिमवर्षाको धेरै प्रभावमा परेको न्यूयोर्क, न्यूजर्सी, मेरिल्याण्ड, भर्जिनिया, नर्थक्यारोलिना, बासिङ्टन डिसी, टेक्सस, केन्टकी, टेनिसी, लुजियाना, न्यूमेक्सिको, ओक्लहामा, जर्जिया र अलबामा राज्यका १० लाख बढी मानिस दुई दिनसम्म विद्युतविहीन अवस्थामा दैनिकी बिताउन बाध्य भएका थिए ।

यसैगरी, चार दिनको अन्तरालमा अमेरिकी उडान क्षेत्र धेरै प्रभावमा परेको छ । खराब मौसम र भिजिभिलिटी न्यून हुँदा चार दिनमा २४ हजार बढी उडान रद्द गरिएको थियो । जनवरी २३ देखि २७ सम्म २४ हजार ६ सय ५४ उडान रद्द भएका छन् । जनवरी २३ मा ६ सय ९०, २४ मा ४ हजार १ सय, २५ मा सबैभन्दा बढी ११ हजार ६ सय १९, २६ मा ६ हजार ३ सय र २७ मा १ हजार ८ सय ४५ उडान रद्द गरिएको फ्लाइटअवेरमा उल्लेख गरिएको छ ।