काठमाडौँ — सिरिया सरकार र अल्पसंख्यक कुर्दिश  नेतृत्वमा रहेको सिरियन डेमोक्रेटिक फोर्सेस (एसडिएफ) बीच युद्धविराम भएको छ । झन्डै दुई साता लामो लडाँइपछि दुई पक्षबीच १४ बुँदे सम्झौता भएको हो ।

यस सम्झौतामा एसडिएफलाई सिरियाको सेना र सरकारी निकायहरुमा समायोजन गर्ने उल्लेख छ । यससँगै देशको सम्पूर्ण भूभाग सरकारको नियन्त्रणमा आएको सिरियाको सरकारी सञ्चारमाध्यमले जनाएको छ । 

सिरियाका अल्पंसख्यक समुदायमध्ये कुर्दिश सबैभन्दा ठूलो समुदाय हो । यहाँ कुल जनसंख्याको झन्डै १० प्रतिशत (झन्डै २५ लाख ) कुर्दिश छन् । सिरियाले कुर्दिश संस्कृति र भाषिक अधिकारलाई मान्यता दिने प्रतिवद्धता पनि दोहोर्‍याएको छ ।

कुर्दिश भाषालाई आधिकारीक भाषाको रुपमा प्रयोग गरिने र कुर्दिश नयाँ वर्षमा राष्ट्रिय बिदा दिइने सहमति भएको छ । फ्रान्सको उपनिवेशबाट सन् १९४६ मा स्वतन्त्र भएयता कुर्दिशहरुले सिरियामा पहिलोपटक पहिचानको अधिकार पाएका हुन् । यस सम्झौतामा सिरियाले अमेरिका नेतृत्वको ईस्लामिक स्टेटविरुद्धको लडाँइमा सहभागिता जनाउने पनि उल्लेख छ । 

सिरियाका राष्ट्रपति अहमद अल साराले यस सम्झौतासँगै  उत्तरपूर्वी क्षेत्रका अल हासाकाह, देर इज्जोर र राका सरकारको नियन्त्रणमा आएको बताए । राष्ट्रपति अल सारा र सिरियाका लागि अमेरिकी विशेष दूत टम बाराकबीच भेट भएको केही समयभित्रै यो सम्झौता भएको हो । बाराकले यस सम्झौतालाई एकिकृत सिरियातर्फको महत्वपूर्ण कदमका रुपमा प्रशंसा गरे ।  

एसडिएफ कमाण्डर मजलोम अब्दीले पनि यस बैठकमा सहभागिता जनाउने अपेक्षा गरिएको थियो । तर, खराब मौसमले भ्रमण स्थगित भएको र उनी सोमबारमात्रै आइपुग्ने अल साराले बताए । अब्दीले टेलिभिजन सम्बोधन गर्दै सहमतिको पुष्टि गरेका छन् । उनले  राजधानी दमास्कसबाट फर्केपछि सम्झौताका विषयमा सिरियाली कुर्दहरुलाई बिस्तृत जानकारी उपलब्ध गराउने बताएका छन् ।