काठमाडौँ — नाइजरियाको उत्तरपश्चिमी क्षेत्रमा इलास्मिक स्टेट  (आइएस)  विद्रोहीहरुमाथि अमेरिकाले हमला गरेको छ ।

यसअघि गत महिना अमेरिकी राष्ट्रपति डोनाल्ड ट्रम्पले अमेरिकी रक्षा विभागलाई सैन्य हस्तक्षेपको तयारी गर्न आदेश दिएका थिए । 

बिहीबार ट्रम्पले आइएसमाथि आक्रमण गरिएको जानकारी सामाजिक सञ्जाल ट्रुथमार्फत दिए । आईएसले निर्दोष ईसाई धर्मालम्बीलाई निशाना बनाएकाले यस्तो आक्रमण गर्नुपरेको ट्रम्पको दाबी छ ।

सामाजिक सञ्जाल ट्रुथमा गरिएको पोस्टमा उनले लेखेका छन्, ‘ मेरो नेतृत्वमा हाम्रो देशले अतिवादी इस्लामिक आतंकवादलाई फक्रन दिदैंन ।’   अमेरिकी सेनाको अफ्रिका कमाण्ड (अफ्रिकम) ले  नाइजेरियासँग समन्वय गरेर सोकोटो राज्यमा आक्रमण गरिएको जानकारी दिएको छ ।  

नाइजेरियाली विदेशमन्त्री युसुफ मैतामा तुग्गरले आक्रमणको पुष्टि गरेका छन् । तर, धर्मसँग यसको सम्बन्ध नरहेको बताएका छन् । 

'यो आतंकवादीहरूलाई लक्षित गरिएको संयुक्त अपरेशन थियो कुनै विशेष धर्मसँग यसको कुनै सम्बन्ध छैन,' तुग्गरले बेलायती सञ्चारमाध्यम बीबीसीसँग भनेका छन् । 

अमेरिकाले सैनिक हस्तक्षेप गरेको नाइजेरिया विगत एक दशकभन्दा लामो समयदेखि गृहयुद्धमा छ । यहाँ अल्पसंख्यक  ईसाईमाथि भइरहेको जातीय नरसंहारविरुद्ध नाइजेरिया सरकारले केही गर्न नसकेको आरोप अमेरिकाको छ ।

नाइजेरियाले यसलाई अस्विकार गर्दै आएको छ । संविधानले सुनिश्चित गरेको  धार्मिक स्वतन्त्रतालाई कायम गर्ने विषय सरकारले सधैं प्राथमिकतामा राखेको नाइजेरियाको दाबी छ ।

आइस को हो ?

कुनै समय सिरिया र इराकमा ठूलो भूभागमा फैलिएको आईएस अहिले पनि मध्यपूर्व र अफ्रिकाका केही देशहरुमा सक्रिय छ । अफ्रिकामा यसको सबैभन्दा ठूलो उपस्थिती नाइजेरियाको उत्तरपूर्वी बोर्नो र योबे राज्य तथा चाद बेसिन क्षेत्रमा (नाइजर, चाद, नाइजेरिया, क्यामरुनमा फैलिएको ) छ । 

आईएसअघि २००० को दशकमा उत्तरी नाइजेरियामा बोको हराम विद्रोही संगठन सक्रिय थियो । यस उग्रवादी इस्लामिक समहुले पश्चिमी शिक्षा बहिस्कार र धर्मनिरपेक्ष संविधान खारेजीको माग गरेको थियो ।

सन् २००९ मा बोको हरामका नेता मोहम्मद युसुफ मारिएपछि यस संगठनले हिंसात्मक गतिविधिलाई थप बढायो । २०१५ सम्म आइपुग्दा यो संगठन आफैं विभाजित भइरहेको थियो ।