एजेन्सी — सिड्नीको बोन्डाइ तटमा आयोजित यहूदी समुदायको हनुक्का कार्यक्रममा गोली चलाएको अभियोगमा पक्राउ परेका २४ वर्षका नाविद अकरमविरूद्ध प्रहरीले ५९ वटा मुद्दा दर्ता गरेको छ ।

न्यु साउथ वेल्स प्रहरीले उनीविरूद्ध दर्ता गरेका मुद्दामध्ये १५ वटा हत्या अभियोगका छन् । त्यस्तै हत्या गर्ने नियतले गम्भीर शारीरिक क्षति पुर्‍याएको अभियोगमा ४० वटा मुद्दा दर्ता भएका छन् । यसबाहेक आतङ्कवादी गतिविधि गरेको, हतियारबाट गोली चलाएको, विस्फोटक पदार्थ राखेको र सार्वजनिक रूपमा आतङ्कवादी संगठनको चिन्ह प्रदर्शन गरेको अभियोग लगाइएको छ ।

१४ डिसेम्बरमा हनुक्का महोत्सवका दौरान गोली चलेको थियो । सीसीटीभी फुटेजमा देखिएका गोली चलाउने दुई अभियक्त  साजिद अकरम र नविद अकरम रहेको प्रहरी अनुसन्धानले देखाएको छ । उनीहरु बाबु-छोरा हुन् ।

दुईमध्ये ५० वर्षका साजिदको घटनास्थलमै प्रहरीको गोली प्रहारबाट मृत्यु भएको थियो । घटनामा उनीहरुको आक्रमणमा १५ जना सर्वसाधारणको ज्यान गएको थियो । 

बाबु साजिद भारतको हैदरावाद शहरबाट सन् १९९८ अस्ट्रेलिया बसाई सरेको तेलांगानाका प्रहरी अधिकारीलाई उद्धृत गर्दै बेलायती सञ्चारमाध्यम बीबीसीले जनाएको छ ।

विश्वविद्यालयस्तरको अध्ययन पूरा गरेपछि रोजगारीका लागि साजिद अस्ट्रेलिया गएको र त्यहाँ युरोपेली मुलकी एक महिलासँग विवाह गरेको ती अधिकारीले बताएका छन् ।

प्रहरीका अनुसार उनी ६ पटक भारत भ्रमणमा आएका थिए । भारतमा उनका कुनै आपराधिक अभिलेख नभएको पनि ती अधिकारीले बताए ।

छोरा नाविद अस्ट्रेलियामै जन्मिएका हुन् । 'कट्टरपन्थी भएकाले हुनसक्छ, पछिल्लो समय भारतमा रहेको परिवारसँग सजिदको खासै सम्पर्क भएको देखिन्‍न,' ती प्रहरी अधिकारीले भने । 

दोस्रो विश्वयुद्धमा नाजी शासनको बर्बरता झेलेर १९९० को दशकमा युरोपबाट अस्ट्रेलिया आएका वयोवृद्धदेखि १० वर्षकी बालिकासम्मले यस घटनामा ज्यान गुमाएका छन् । छोरा नविदलाई प्रहरीले पक्राउ गरेर अस्पताल लगेको थियो । अहिले उनको उपचार भइरहेको छ ।

उपचारपछि मात्रै उनको बयान लिइने प्रहरीले जनाएको छ । अदालती प्रक्रिया अप्रिलसम्मका लागि सारिएको छ । यो घटना सन् १९९६ पछि अष्ट्रेलियामा भएको सबैभन्दा ठूलो सामूहिक गोलीकाण्ड हो ।

२८ अप्रिल १९९६ मा अस्ट्रेलियाको तास्मानियास्थित पोर्ट आर्थरमा एक बन्दूकधारीले गोली चलाउँदा ३५ जनाको मृत्यु र २३ जना घाइते भएका थिए । यस घटनापछि अस्ट्रेलियाले बन्दूक सम्बन्धी कानुन कडा बनाएको थियो ।  

जसले बन्दूक खोसे 

अन्य धेरै अस्ट्रेलियनजस्तै अहमद अल अहमद पनि घुमफिर गर्न र कफी पिउनका लागि बोन्डाइ तट पुगेका थिए । समुद्रकिनार नजिकैको पार्कमा हानुक्का पर्व मनाइरहेका यहूदीहरूलाई लक्षित गरी दुई जना बन्दुकधारीले अचानक रक्तपातपूर्ण आक्रमण सुरु गरे ।

केही बेरमै अहमद अल अहमद दुईवटा पार्क गरिएका गाडीबीच झुकेर लुक्दै अघि बढे र एक जना बन्दुकधारीतर्फ सिधै दौडिए। विश्वभर लाखौँ पटक हेरिएको भिडियोमा उनले एक जना आक्रमणकारीलाई लडाएर उसको हातबाट शटगन खोस्दै आक्रमणकारीतर्फ नै फर्काएको देखिन्छ ।

त्यसयता दोस्रो आक्रमणकारीले उनीमाथि जथाभावी गोली चलाएका थिए । जसकारण उनको बाँया हातमा धेरैवटा गोली लाग्यो । अस्ट्रेलियाका प्रधानमन्त्री एन्थोनी एल्बानीजले अल अहमदको बहादूरीको प्रशंसा गरेका छन् । उनले अहमद मानवताको उज्यालो किरण रहेको बताए । 

विवाहित र दुई  छोरीका पिता अहमदले अब लामो उपचार र पुनःस्थापनाको सामना गर्नुपर्नेछ । ४४ वर्षीय अहमद सिरियाली मुलका हुन् । उनको स्थायी घर इडलिब क्षेत्रको नायराब शहर हो ।

सन् २००६ मा अध्ययनका लागि अस्ट्रेलिया आउनुअघि उनले सिरियामा प्रहरी र केन्द्रीय सुरक्षा बलमा सेवा गरेका थिए । सन् २०११ मा सुरु भएको गृहयुद्धले नायराब शहर ध्वस्त भयो । त्यसपछि उनी अस्ट्रेलियामै व्यापार गरेर बसे । 

बन्दूक कानुन कडा बनाउँछौं : प्रधानमन्त्री एल्बानीज 

अस्ट्रेलियाका प्रधानमन्त्री एन्थोनी एल्बानीजले बन्दूक कानुलाई थप कडा बनाइने बताएका छन् । अस्ट्रेलियामा अहिले पनि विश्वकै कडा बन्दूक कानुन छ ।

पोर्ट आर्थ गोली प्रकरणपछि यस्तो कानुन ल्याइएको थियो । यस कानुनले सेमी–अटोमेटिक राइफल र पम्प–एक्सन सटगनको बिक्रीमा प्रतिबन्ध लगायो र राष्ट्रिय ‘बाइब्याक’ कार्यक्रम सुरु गर्‍यो ।