एजेन्सी — अस्ट्रेलियाको सिनेटले मंगलबार दक्षिणपन्थी सिनेटर पाउलिन हान्सनलाई निलम्बन गरेको छ । सार्वजनिक स्थलमा बुर्का प्रतिबन्ध लगाउनुपर्ने माग गर्दै उनले सोमबार संसद्मा बुर्का लगाएर राजनीतिक स्टन्ट गरेकी थिइन् ।

आप्रवासन विरोधी वान नेशनल पार्टीकी यी सांसद् सात दिनका लागि निलम्बनमा परेकी हुन् । उनले सन् २०१७ मा पनि यस्तै हर्कत गरेकी थिइन् । जसको सार्वजनिक रुपमा ठूलो आलोचना भएको थियो ।

क्विन्सल्यान्डबाट प्रतिनिधित्व गर्ने यी सिनेटरले सिंगो इस्लाम समुदायको आस्थालाई मजाक बनाएको विदेशमन्त्री तथा सिनेटर पेन्नी वोङले बताए । ‘यो अपरिपक्व र लज्जाहिन स्टन्ट हो । जसले केवल एटेन्सनमात्रै खोजेको छ । उनले एउटा सिंगो समुदायको भावनामाथि खेलवाड गरेकी छिन्,’ वाङले भने ।

सिनेटर मेहरुन फारुकीले पटक–पटक हान्सनले यस्तो व्यवहार देखाएर मुस्लिमहरुको भावनामाथि खेलवाड गरेको बताइन् । ‘उनले २०१७ मा स्टन्ट गर्दा सिनेटमा मुस्लिम थिएनन् । तर हामी अहिले दुई मुस्लिम महिला छौं,’ उनले भनिन् ।

उनले प्रमुख दुई पार्टीका विधायकहरुले नै रंगभेदलाई संसद्मा जोगाइराखेको आरोप लगाइन् । ‘तपाईहरुले नै यस्तो हुन दिनुभयो,’ पाकिस्तानमा जन्मिएकी फारुकीले भनिन् । उनी अहिले ग्रिन पार्टीका तर्फबाट संसद्मा छिन् ।