एजेन्सी — पछिल्ला ३३ वर्षमा विपद्का कारण ३ दशमलव २६ ट्रिलियन अमेरिकी डलर बराबरको क्षति भएको संयुक्त राष्ट्रसंघ खाद्य तथा कृषि संस्था (एफएओ) ले जनाएको छ ।

औसतमा प्रति वर्ष ९९ बिलियन अमेरिकी डलर खर्च भइरहेको जनाइएको छ , जो कृषि क्षेत्रको वैश्विक कुल ग्राहस्थ उत्पादनको ४ प्रतिशत हाराहारीमा हो ।

‘कृषि तथा खाद्य सुरक्षामा विपद्को प्रभाव २०२५’ नामक प्रतिवेदनले यस्तो तथ्य उजागर गरेको हो । यसमा डिजिटल प्रविधिको रुपान्तरण, सरकार र समुदायले गरिरहेका पहललगायत विषय उल्लख छ ।

‘वैश्विक कृषि क्षेत्र एउटा गम्भीर मोड छ । यसले विपद्का अनगिन्ती प्रहार सहेको छ । यही समय डिजिटल प्रविधिमा राम्रो प्रगति गरिरहेको छ । जसले विपद्का जोखिमलाई बुझ्न, अनुमान लगाउन र व्यवस्थापन गर्नका लागि नयाँ संभावनाका ढोका खोलेको छ,’ प्रतिवेदनमा उल्लेख छ ।

सन् १९९१ देखि २०२३ सम्म ४ दशमलव ६ बिलियन टन अन्न र  २ दशमलव ८ बिलियन टन फलफूल तथा तरकारी विपद्का कारण क्षति भएको प्रतिवेदनमा उल्लेख छ । त्यस्तै पशुपालनमा भएको क्षतिले ९ सय मिलियन टन मासु तथा डेरीजन्य सामाग्रीको घाटा लागेको छ ।

प्रतिवेदनमा सबैभन्दा धेरै क्षति एशिया महादेशमा पुगेको उल्लेख छ । कृषि क्षेत्रमा पुगेको विपद्को क्षति न्युनीकरण गर्नका लागि डिजिटल रुपान्तरण महत्वपूर्ण हुने प्रतिवेदनमा उल्लेख छ ।