ढाका — बंगलादेशमा निर्वाचन नजिकिँदै गर्दा तोडफोड र आगजनीका घटना बढेका छन् । बिहीबार मात्र बंगलादेशमा पूर्वप्रधानमन्त्री शेख हसिनाको पार्टी अवामी लिगको केन्द्रीय कार्यालयमा तोडफोड तथा आगजनी गरिएको छ ।

बिहीबार दिउँसो एक बजेपछि यस पार्टीविरुद्ध नाराबाजी गर्दै एउटा समूह कार्यालय छिरेको थियो । उक्त समूहले कार्यालयमा रहेका केही ब्यानर जम्मा गरेर आगजनी गरेको बंगलादेशी सञ्चारमाध्यम द डेली स्टारले जनाएको छ । बिहीबारै छुरा प्रहारबाट राजशाही मेट्रोपोलिटन सेसनका न्यायाधीश अब्दुर रहमानका छोराको मृत्यु भएको छ भने पत्नी गम्भीर घाइते छिन् । 

आगामी फेब्रुअरीमा चुनाव गर्ने सरकारको लक्ष्य रहे पनि वातावरण बिग्रँदै गएको छ । अवामी लिगले बिहीबार ढाका बन्दको घोषणा गरेको थियो । उसले आइतबारसम्म देशव्यापी विरोध प्रदर्शनका कार्यक्रम राखेको छ । तर यस पार्टीविरुद्ध राजनीतिक गतिविधि गर्न सरकारले रोक लगाएको छ । यस्तो अवस्थामा अवामी लिगले गर्ने राजनीतिक गतिविधिविरुद्ध सरकार समर्थक विभिन्न राजनीतिक दल तथा समूहले प्रदर्शन गर्ने चेतावनी दिएका थिए । 

बंगलादेशको अन्तर्राष्ट्रिय अपराध ट्राइबुनल–१ (आईसीटी–१) ले अपदस्थ प्रधानमन्त्री शेख हसिना र उनका दुई सहयोगीको मुद्दामा १७ नोभेम्बरमा फैसला सुनाउने भएको छ । ट्राइबुनलका अध्यक्ष न्यायाधीश मोहम्मद गोलाम मोजुम्दरले १७ नोभेम्बरका लागि फैसला मिति तोकका हुन् । 

गत जुलाईमा सुरु भएको आन्दोलनमा दमन गर्ने क्रममा मानवताविरुद्धको अपराध गरेको भन्दै हसिनाविरुद्ध मुद्दा चलाइएको हो । पूर्वगृहमन्त्री असदुजामन खान कमाल र पूर्वप्रहरी महानिरीक्षक चौधरी अल मामुनमाथि पनि मानवताविरुद्धको अपराध गरेको अभियोग छ ।

बंगलादेशमा (जुलाई–अगस्ट) २०२४ मा चलेको सरकारविरोधी प्रदर्शनमा प्रहरीले गोली चलाउँदा झन्डै ६ सय ५० जना मारिएका थिए । प्रदर्शनपछि शेख हसिना ५ अगस्टमा देश छाडेर भागेकी थिइन् । त्यसको तीन दिनपछि बंगलादेशमा निर्वाचन गराउन नोबेल शान्ति पुरस्कार विजेता मोहम्मद युनुसको नेतृत्वमा अन्तरिम सरकार गठन भएको थियो । त्यसयता हसिनामाथि हत्याको योजना बनाएको, हत्या प्रयास गरेको, यातना दिइएको र अन्य अमानवीय कार्य गरेको आरोपमा छानबिन जारी छ । 

प्रहरीले हिंसात्मक गतिविधिमा संलग्न भएको आरोपमा धेरै मानिसलाई पक्राउ गरेको छ । आइतबार, सोमबार र मंगलबार देशका विभिन्न क्षेत्रमा क्रुड बम विस्फोट तथा आगजनीका घटना भएपछि प्रहरीले शंकास्पद व्यक्तिलाई पक्राउ गरेर अनुसन्धान थालेको हो । सरकारले विभिन्‍न स्थानमा गस्तीसमेत बढाएको छ । प्रहरीसँगै सेना, र्‍यापिड एक्सन बटालियन र सीमा सुरक्षा दलले पनि विभिन्न क्षेत्रमा गस्ती गरिरहेका छन् । कडा सुरक्षाका कारण बिहीबार ढाकाका सडकमा ट्राफिक आवागमन तुलनात्मक रूपमा कम रह्यो । 

पछिल्ला डेढ महिनामा प्रदर्शनका लागि भड्काउन खोज्ने ५ सय ५२ जनालाई प्रहरीले नियन्त्रणमा लिएको छ । विशेषगरी गत आइतबारयता शृंखलाबद्ध रूपमा विस्फोट तथा आगजनीका घटना भएका छन् । आइतबार तथा सोमबार प्रदर्शनकारीहरूले भवन तथा बसहरूमा क्रुड बम फालेका थिए । गत आइतबार र सोमबार मात्रै १७ ठाउँमा बम फालिएको र ९ वटा गाडीमा आगजनी गरिएको बंगलादेशी सञ्चारमाध्यम द डेल्ली स्टारले जनाएको छ ।