निर्वाचनको प्रारम्भिक रुझानले स्पष्ट रुपमा राष्ट्रिय जनतान्त्रिक गठबन्धन (एनडिए) पक्षमा बहुमत आउने देखाएको छ । कुल २ सय ४३ सिटमध्ये अहिलेसम्म १ सय ९० सिटमा एनडिएले अग्रता हासिल गरिरहेको छ ।
What you should know
एजेन्सी — बिहारमा सत्तारुढ एनडिए र विपक्षी महागठबन्धनबीचको प्रतिस्पर्धा चर्कै हुने अनुमान लगाइएको थियो । महागठबन्धनका उम्मेदवारहरुलाई चुनावी अभियानका दौरान जनताको राम्रो साथ मिलेजस्तो देखिन्थ्यो । तर ब्यालेट बक्समा अलग देखियो ।
निर्वाचनको प्रारम्भिक रुझानले स्पष्ट रुपमा राष्ट्रिय जनतान्त्रिक गठबन्धन (एनडिए) पक्षमा बहुमत आउने देखाएको छ । कुल २ सय ४३ सिटमध्ये अहिलेसम्म १ सय ९० सिटमा एनडिएले अग्रता हासिल गरिरहेको छ ।
सत्तारुढ एनडिएका गठबन्धनका घटकमध्ये भारतीय जनता पार्टी (भाजपा) ८३ , जनता दल युनाइटेड (जदयू) ७९ र लोक जनशक्ति पार्टी राम विलासले २२ स्थानमा अग्रता बनाएका छन् । विपक्षी महागठबन्धनले ४९ स्थानमा अग्रता बनाएको छ ।
यस गठबन्धनका मुख्य घटक राष्ट्रिय जनता जनता पार्टी (राजद) ३२ , कंग्रेस ६ र भारतीय कम्युनिष्ट पार्टी (माक्र्सवादी–लेलिनवादी ) ६ स्थानमा अघि छन् । जबकी अघिल्लो निर्वाचनमा ७५ सिट जितेर राजद सबैभन्दा ठूलो दल बनेको थियो ।
महिला र वृद्धवृद्धाको मत
यसपटक निर्वाचनमा ठूलो संख्यामा महिला र वृद्धवृद्धाले मत खसाले । कुल मतमध्ये ७१ दशमलव ६ प्रतिशत महिला र ६२ दशमलव ८ प्रतिशत पुरुष थिए । सरकारले निर्वाचनको केही समयअघि मात्रै १ करोड ४० लाख महिलाको खातामा १० हजार भारू सहायतास्वरुप सीधा पठाइदिएको थियो ।
मुख्यमन्त्री महिला रोजगार योजनाअन्तर्गत पठाइएको यो रकम महिला शशक्तिकरण र कल्याणकारी योजना मानिन्छ । यसले महिला उद्यमी तयार गर्ने लक्ष्य राखेको छ र पारदर्शी रुपमै यो पैसा खातामा पठाइएको हो ।
यद्यपी निर्वाचनको मुखमा सरकारले पैसा वितरण गर्दाको प्रभाव रुपमा मतपत्रमा देखिएको छ । विपक्षी महागठबन्धनले यसरी चुनावको मुखमा पैसा पठाउने कार्यको विरोध गरेपनि त्यसलाई रोक्न सकेन । अर्कोतर्फ उसले आफैं पनि विजयी भएमा विभिन्न स्किम ल्याउने घोषणा गरेको थियो ।
मुख्यमन्त्रीका भावी उम्मेदवारका रुपमा प्रचार गरिएका महागठबन्धनका तेजस्वी यादवले आफु विजयी भएमा महिलालाई २५ सय प्रति महिना भत्ता दिने घोषणा गरेका थिए । तर उनलाई जनताले पत्याएको देखिएन । त्यस्तै, नयाँ सरकार बनेको २० दिनभित्र एक घरका कम्तिमा एकजनालाई रोजगारी दिने विधेयक सदनमा पेश गर्ने घोषणा पनि गरेका थिए ।
जेष्ठ नागरिक भत्ता ४ सयबाट बढाएर ११ सय भारुमा लैजानु मुख्यमन्त्री नितिशकुमारको अर्को सफलता थियो । विधवा, अपांगता भएका व्यक्ति र राज्यको सामाजिक सुरक्षा भत्ता पनि बढाइएको थियो । जसबाट कुल १ करोड ९० लाख जनसंख्या प्रत्यक्ष लाभान्वित थियो । ठूलो संख्यामा जेष्ठ नागरिक यसपटक नितिशकुमारको पक्षमा र्यालीमा देखिएका थिए ।
निशुल्क बिजुली
१ सय २५ युनिटसम्म बिजुली सित्तैमा दिने एनडिए गठबन्धनको घोषणा अर्को गेम चेन्जर बन्यो । जनताका सुख-दुखमा सरकार साथ रहेको देखाउन यस्तो योजना अघि बढाएको थियो ।
भारतीय प्रधानमन्त्री नरेन्द्र मोदीको लोकप्रियताले पनि एनडिएका पक्षमा जनलहर ल्याउन सहयोग पुर्याएको छ । जदयू कार्यकर्ताहरुले मुख्यमन्त्री नितिशकुमारलाई बिहारको विकासको मसिहाका रुपमा चित्रण गरेका थिए । उनीहरुले 'सुशासन र विकासका लागि एनडिए' सरकार नारा दिएका थिए । अहिले भाजपा र जदयूका कार्यालयमा खुसीयाली सुरु भइसकेको छ । जदयू कार्यकर्ताहरुले 'फिर एक बार नितिश सरकार ' नारा लगाएका छन् ।
