काठमाडौँ — मलेसियाको सेलाङ्गोर राज्यस्थित कम्पुङ बारु अम्पाङ क्षेत्रमा रहेका छ वटा कारखानामा छापा मार्दा २८ जना विदेशी श्रमिकसहित ४२ जना पक्राउ परेका छन् । ती श्रमिकको राष्ट्रियता खुलाइएको छैन ।

उनीहरुलाई कारखानाहरू विभिन्न ब्रान्डका नक्कली सवारीसाधन लुब्रिकेन्ट उत्पादन, आपूर्ति र बजारमा बिक्री गर्ने गतिविधिमा संलग्न रहेको अभियोग लगाइएको छ ।

सेलाङ्गोर घरेलु व्यापार तथा उपभोक्ता मामिला मन्त्रालयका निर्देशक मोहद जुहैरी मात राडीका अनुसार बुधबार बिहान १० बजे गरिएको संयुक्त अपरेसनमा झण्डै १० लाख रिङ्गिट बराबरका लुब्रिकेन्ट र प्रशोधन तथा बोटलिङ मेसिनरी बरामद गरिएको छ ।

उनका अनुसार यो कारबाही सेलाङ्गोर प्रहरी विशेष शाखा र ट्रेडमार्क अधिकारधारी कम्पनीका प्रतिनिधिहरूको सहकार्यमा, दुई महिनासम्मको गोप्य अनुसन्धानपछि सञ्चालन गरिएको हो ।