अमेरिका — महाशक्ति राष्ट्र अमेरिकाको महाशक्ति महानगर न्यूयोर्कको नेतृत्वका लागि चुनावी प्रतिस्पर्धा सुरु भएको छ । स्थानीय समय अनुसार आज मंगलबार नोभेम्बर ४ इलेक्सन डेका दिन मतदान प्रक्रियासँगै त्रिपक्षीय प्रतिस्पर्धा सुरु भएको हो ।

न्यूयोर्कको मेयरका लागि पछिल्लो समय चर्चा बटुलेका मुस्लिम आप्रवासी न्यूयोर्ककै राज्यसभाका पूर्वसदस्य जोहरान क्वामे मम्दानी, न्यूयोर्कका पूर्वगर्भनर एन्ड्रयु क्युओमो र रिपब्लिकन नेता कार्टिस सिल्वा चुनावी प्रतिस्पर्धामा छन् । मम्दानी ड्रेमोक्र्याट, क्युओमो स्वतन्त्र र सिल्वा रिपब्लिकनबाट चुनावी प्रतिष्पर्धामा उत्रिएका हुन् । 

अमेरिकाको राजनीतिमै प्रभाव पार्न सक्ने न्यूयोर्क सहरको नेतृत्व प्रतिस्पर्धालाई अमेरिकी शीर्ष नेताहरुले महत्त्वपूर्ण मानेका छन् । सबैभन्दा बढी आप्रवासी रहेको न्यूयोर्कको नेतृत्वका लागि आप्रवासी मम्दानीको चर्चाका कारण राष्ट्रपति डोनाल्ड ट्रम्पसमेत चुनावी रणनीतिमा प्रत्यक्ष जोडिएका छन् ।

आफ्नै पार्टी रिपब्लिनका नेता सिल्वालाईसमेत समर्थन नगरेका ट्रम्पले मम्दानी मेयरमा विजयी भएको अवस्थामा संघीय अनुदान रोक्न सक्ने चेतावनी दिएका छन् । राष्ट्रपति ट्रम्पले चुनावी प्रतिस्पर्धा कडा हुने भएपछि मम्दानीको खुलेर विरोध गर्दै स्वतन्त्र उम्मेदवार क्युओमोको समर्थन गरेका हुन् । 

उनी आफ्नो पार्टी रिपब्लिकनका उम्मेदवार सिल्वाको सवालमा मौन रहेको देखिन्छ । ‘तपाईंलाई क्युओमा मन पर्छ वा पर्दैन, त्यो फरक पर्दैन । तपाईंले उनलाई भोट दिनैपर्छ र आशा पनि गर्नुपर्छ कि उनले उत्कृष्ट काम गर्नेछन् । उनी सक्षम छन्, तर माम्दानी सक्षम छैनन्,’ ट्रुथ सोसलमा पोस्ट गर्दै ट्रम्पले लेखेका छन् ।

ट्रम्पले यसअघि पनि मम्दानीको खुलेर विरोध गर्दै आएका थिए । उनले टेलिभिजन अन्तर्वार्ताका क्रममा कम्युनिस्टले चलाउने सिटीमा आफूले संघीय अनुदान दिन नसक्ने बताएका थिए । उनले मम्दानीले जिते अनुदानको दुरुपयोग हुने दाबीसमेत गरेका थिए । विभिन्न माध्यमबाट गरिएको जनमत सर्वेक्षणहरुका अनुसार, डेमोक्रेटिक उम्मेदवार माम्दानी अग्रस्थानमा थिए ।