अमेरिका — अमेरिकाको मिसिसिपी राज्यमा शुक्रबार राति भएको गोली काण्डमा चार जनाको मृत्यु छ भने १२ जना घाइते भएका छन् ।

मिसिसिपी राज्यको उत्तर–पश्चिममा पर्ने लेल्यान्ड सहरमा शुक्रबार राति डाउनटाउन नजिक अनियन्त्रित रूपमा भएको गोली काण्डमा १६ जनामाथि आक्रमण भएको मेयर जोन लीले बताएको सिएनएनले उल्लेख गरेको छ । स्थानीय समय अनुसार शुक्रबार दिउँसो लेल्यान्ड हाइस्कुलको होमकमिङ अमेरिकन फुटबल प्रतिस्पर्धा सकिएपछि आयोजना गरिएको भेलामा गोली काण्ड भएको हो ।

१६ जनालाई गोली लाग्दा चार जनाको मृत्यु भएको र १२ जना घाइतेको तीव्र उद्धारपछि उपचार जारी रहेको लेल्यान्ड प्रहरीले जनाएको छ । हालसम्म गोली काण्डसँग सम्बन्धित कोही फेला नपरेको र अनुसन्धान जारी रहेको मेयर लीले बताइन् ।