टेसा वोङ — रुसी राष्ट्रपति भ्लादिमिर पुटिनले गत महिना अलास्कामा भएको बैठकमा युक्रेन युद्ध अन्त्यका बारेमा अमेरिकी राष्ट्रपति डोनाल्ड ट्रम्पसँग समझदारी भएको बताएका छन् ।

चीनमा आयोजित सांघाई सहयोग संगठन शिखर सम्मेलनमा बोल्दै पुटिनले युक्रेनमा आक्रमण गर्ने आफ्नो निर्णयको बचाउ गर्दै युद्धका लागि पश्चिमा देशहरूलाई दोष दिए । अलास्का बैठकपछि नै अमेरिकी विशेषदूत स्टिभ विटकफले पनि सम्भावित शान्ति सम्झौताको एक पक्ष युक्रेनको सुरक्षा ग्यारेन्टी गर्न पुटिन सहमत भएको जनाएका थिए । यद्यपि मस्कोले यसबारेमा हालसम्म कुनै टिप्पणी गरेको भने छैन ।

शिखर सम्मेलनमा सहभागी चिनियाँ राष्ट्रपति सी चिनफिङ र भारतीय प्रधानमन्त्री नरेन्द्र मोदीलाई लक्षित गर्दै पुटिनले ‘युक्रेनी संकटको समाधानलाई सहज बनाउन’ उनीहरूले गरेको प्रयास र समर्थनका लागि पनि धन्यवाद दिएका थिए । चीन र भारत रुसी कच्चा तेलका सबैभन्दा ठूला खरिदकर्ता पनि हुन्, जसका कारण यतिबेला अमेरिकी राष्ट्रपति डोनाल्ड ट्रम्प भारतसँग चिढिएका छन् । भारतले तेल खरिद गरेर रुसलाई सहयोग गरिरहेको आरोप लगाउँदै भारतीय वस्तुमा अतिरिक्त ट्यारिफ लगाएका थिए ।