कोलम्बो — पदमा रहँदा सार्वजनिक कोष दुरुपयोग गरेको आरोपमा पक्राउ परेका श्रीलंकाका पूर्वराष्ट्रपति रनिल विक्रमासिंघेलाई मंगलबार धरौटीमा रिहा गरिएको छ । विक्रमासिंघे पक्राउ पर्ने पहिलो श्रीलंकाली पूर्वराष्ट्रप्रमुख हुन् ।

राष्ट्रपति अनुरा कुमार दिसानायके नेतृत्वमा भ्रष्टाचारविरुद्धको अभियानअन्तर्गत सुरु गरिएको छानबिनमा धेरैजसो उच्चस्तरीय पूर्वमन्त्री र राजनीतिक नेताहरू छन् । उनीहरूमध्ये विक्रमासिंघे सबैभन्दा चर्चित नेता हुन् । विपक्षी दलका वरिष्ठ नेता एवं विक्रमासिंघेका सहयोगी दनुष्का रामानायकका अनुसार उनलाई कोलम्बोको मजिस्ट्रेट अदालतले जमानत दिएको हो । तर निर्णयको थप विवरण सार्वजनिक गरिएको छैन ।

शुक्रबार पक्राउ परेका पूर्वराष्ट्रपति अहिले कोलम्बो राष्ट्रिय अस्पतालको सघन उपचार कक्षमा छन् । उनलाई डिहाइड्रेसन र अन्य स्वास्थ्य समस्या भएपछि शनिबार अस्पताल भर्ना गरिएको थियो । अस्पताल निर्देशक डा. प्रदीप विजेसिंघेले सोमबार मिडियालाई विक्रमासिंघेको स्वास्थ्य स्थिर रहेको बताएका थिए ।

विक्रमासिंघेमाथि सन् २०२३ मा क्युबा र अमेरिकाको औपचारिक भ्रमणपछि लन्डनमा आफ्नी श्रीमतीको स्नातक समारोहमा भाग लिन सार्वजनिक कोष प्रयोग गरेको आरोप छ । तर उनको पार्टीले यसलाई आधिकारिक हैसियतमा प्राप्त निमन्त्रणाअनुसार भएको भन्दै बचाउ गरेको छ ।

जमानत सुनुवाइका क्रममा उनका हजारौं समर्थक सडकमा उत्रिएर गिरफ्तारीलाई ‘राजनीतिक विच हन्ट’ (आफ्ना राजनीतिक विरोधीहरूलाई खोजी खोजी प्रतिशोध लिने) भन्दै विरोध जनाएका थिए । ६९ वर्षीय समर्थक समरासिरी कुरुविताराच्चीले सरकार जनतासँग गरेको वाचा पूरा गर्न असफल भएको र अहिले ‘राजनीतिक विरोधीहरूलाई दबाउन खोजिरहेको’ आरोप लगाए । ‘देशका लागि धेरै योगदान पुर्‍याएका विक्रमासिंघेको गिरफ्तारीको हामी कडा निन्दा गर्छौं । हामी उहाँलाई न्याय दिलाउन भेला भएका हौं,’ समरासिरीले भने ।

विपक्षी सांसद तथा नेताहरूले सरकारको यो कदमले श्रीलंकाको लोकतन्त्रलाई कमजोर बनाएको टिप्पणी गरेका थिए । तर यातायातमन्त्री विमल रत्नायकेले भने आरोप अस्वीकार गर्दै विक्रमासिंघेको गिरफ्तारी कानुनअनुसार भएको बताए । उनले सोमबार स्थानीय सञ्चारमाध्यमसँग भने, ‘सरकारलाई अघिल्लो सरकारको अनियमितताको छानबिन गर्ने जनादेश छ र कानुन सबैमा समान रूपमा लागू हुन्छ ।’