‘राष्ट्रपति सी मलाई चीन बोलाउन चाहनुहुन्छ । यो निकै महत्त्वपूर्ण सम्बन्ध हो । हामी चीनबाट भन्सार शुल्क र अन्य कारणले धेरै पैसा संकलन गरिरहेका छौं । तर हामी चीनसँग राम्रो गर्नेछौं,’ ट्रम्पले भने । उनका अनुसार अहिलेको चीनसँगको आर्थिक सम्बन्ध अघिल्लो बाइडेन प्रशासनको तुलनामा धेरै बलियो छ । यस वर्षको सुरुमा अमेरिकी प्रशासनले सबै चिनियाँ सामानमा १ सय ४५ प्रतिशत कर लगाएको थियो । यसको जवाफी कदमस्वरूप बेइजिङले अमेरिकी निर्यातमा पनि १ सय २५ प्रतिशत कर लगाएपछि दुई देशबीचको व्यापारिक सम्बन्ध निकै चिसिएको थियो ।

जेनेभामा मे महिनामा वार्ताकारहरूले अतिरिक्त करहरू रोकिने सहमति गरेका थिए तर ट्रम्पले अझै थप दण्डको चेतावनी दिन छाडेका छैनन् । गत साता मात्रै उनले चिनियाँ निर्मित म्याग्नेटमा २ सय प्रतिशत कर लगाउने घोषणा गरेका थिए । म्याग्नेटलाई उनले विश्व बजारमा बेइजिङको ‘एकाधिकार’ का रूपमा चित्रण गरेका थिए । ‘यसमा कुनै समस्या आउँछ भन्ने मलाई लाग्दैन,’ ट्रम्पले थपे, ‘चीनले बुद्धिमानीपूर्वक विश्वको म्याग्नेट बजारमा एकाधिकार बनाएको छ । तिनीहरूलाई पाउन सम्भवतः हामीलाई एक वर्ष लाग्न सक्छ ।’