काठमाडौँ — इजरायलको हवाई आक्रमणमा परी अल-जजीराका पाँच जनासहित छ पत्रकार मारिएका छन् । आइतबार इजरायलले गाजास्थित अल-शिफा अस्पतालमा आक्रमण गर्दा उनीहरु मारिएका हुन् ।

अल-जजिराका अनुसार संवाददाता अनस अल–शरीफ र मोहम्मद कुरैके, क्यामेरापर्सन इब्राहिम जहीर र मोआमेन अलिवा र सहयोगी मोहम्मद नौफल र स्वतन्त्र पत्रकार मोहम्मद अल खलिद मारिएका हुन् । 

रिपोर्टर्स विथआउट बोर्डर्स (आरएसएफ)का अनुसार सोही आक्रमणमा परेर थप ३ जना पत्रकार घाइते भएका छन् । 

पत्रकार शरीफले 'हमास'को आतंकवादी सेलको प्रमुखको रुपमा काम गरेको आरोप लगाउँदै इजरायल डिफेन्स फोर्स (आईडीएफ)ले हवाई आक्रमण गरेको स्वीकार गरेको छ । आईडीएफले टेलिग्राममा पोस्ट गर्दै भनेको छ, ‘हमासको आतंकवादी सेलका प्रमुखका रुपमा काम गरिरहेका थिए ।’ 

तर अल-जजिराले सो आरोपलाई अस्वीकार गर्दै उनीहरु अस्पतालको मुख्य द्वारमा बनेको एक त्रिपालमा बसेर रिपोर्टिङ गरिरहेको बताएको छ । अल जजिराका म्यानेजिङ एडिटर मोहम्मद मोआवादले बीबीसीसँग भनेका छन्, ‘अल–शरीफ गाजामा भइरहेको अत्याचारबारे समाचार दिने एक मात्र आवाज थिए ।’ 

कमिटी टु प्रोटेक्ट जर्नलिस्ट (सिपिजे)ले पनि अल-शरीफ गाजापट्टीमा जारी युद्धको सुरुवातदेखि नै अल-जजिराका लागि काम गर्दै आएका थिए । 

शरीफले पहिल्यै भनेका थिए– 'उनीहरु मलाई मार्न चाहन्छन्' 

आईडिएफले यसअघि देखि नै शरीफलाई हमासको सैन्य सदस्य रहेको भन्दै आरोप लगाउँदै आएको थियो । गत जुलाई २४ मा आईडीएफले पत्रकार अल शरीफ सन् २०१३ मा हमासको सैन्य शाखा अल-कस्मामको एक सदस्य रहेको आरोप लगाएको थियो ।