पूर्व सैनिकको नेतृत्वमा इजरायली सैन्य निर्णयको विरोध गर्दै नेतान्याहुविरुद्ध जेरुसेलममा प्रदर्शनकारीले नाराजुलुस गर्दै मार्च गरे।
काठमाडौँ — गाजा शहरलाई पूर्ण रुपमा नियन्त्रणमा लिने इजरायली सुरक्षा क्याबिनेटको निर्णयको विरोधमा जेरुसेलममा प्रदर्शन गरिएको छ ।
प्रदर्शनकारीले जेरुसेलमको सडकमा नाराजुलुससहित प्रधानमन्त्री बेन्जामिन नेतान्याहुको निवासतर्फ मार्च पास गरेका थिए ।
इजरायलका पूर्व सैनिक म्याक्स क्रेसले एक समूहलाई साथमा लिएर मार्च पास गरेका थिए । उनले इजरायली उक्त निर्णय अस्वीकार गर्ने बताएका छन् ।
बीबीसीसँग कुरा गर्दै उनले भने, ‘हामी ३५० भन्दा अधिक सैनिक छौं । जसले युद्ध लडेका थिए । तर हामी नेतान्याहुको राजनीतिक युद्धलाई अस्वीकार गर्छौं ।’
इजरायलको तेल अविवसहित हाइफा लगायका कैयौं शहरमा विरोध प्रदर्शन भएको छ । इजरायलको गाजा शहरलाई नियन्त्रणमा लिने निर्णयलाई लिएर संयुक्त राष्ट्र संघका साथै बेलायत, फ्रान्स, अस्ट्रेलिया, टर्कीए, जर्मनी, फिनल्यान्ड र क्यानडासमेत कैयौं देशले विरोध गरेका छन् ।
इजरायली सेनाले गाजा शहरमा नियन्त्रण र युद्ध अन्त्यका लागि काम गर्ने बताएको छ ।
