वासिङ्टन — पछिल्लो सातायता रुसले युक्रेनमा हमला बढाएपछि युद्धविरामका लागि अमेरिकाले गरिरहेको वार्ताको पहलमा अवरोध मात्रै नभई दुई ठूला शक्ति राष्ट्रको सम्बन्धमा नै चिसोपना बढिरहेको छ । युद्धविराम नगरेको खण्डमा नयाँ ट्यारिफ लगाउने भन्दै अमेरिकी राष्ट्रपति डोनाल्ड ट्रम्पले रुसमाथि दबाब बढाइरहेका छन् । यसै सन्दर्भमा युक्रेनसँगको शान्ति वार्ताका लागि वातावरण सिर्जना गर्ने गरी ट्रम्पका विशेष दूत स्टिभ विटकफले आइतबार मस्को भ्रमण गर्ने नाटोका लागि अमेरिकी राजदूत म्याथ्यु ह्वाइटकरले जनाएका छन् ।

‘आशा छ, जुन उद्देश्यले विटकफले मस्कोको भ्रमण गर्दै हुनुहुन्छ, त्यसमा सफलता हासिल गर्न सक्नुहुन्छ,’ ह्वाइटकरले भनेका छन् । विशेष दूत विटकफले यसअघि पनि कूटनीतिक प्रयासका क्रममा रुसी राष्ट्रपति भ्लादिमिर पुटिनसँग पटक–पटक भेटवार्ता गरिसकेका छन् । ट्रम्पले विटकफको रुस भ्रमणको योजनाबारे जानकारी दिए पनि कहिले र कुन समयमा हुने भन्ने जानकारी दिएका छैनन् ।

त्यसैगरी, अमेरिकाले नाटोका सहयोगीहरूलाई हतियार बेच्न चाहेको पनि ह्वाइटकरले बताए । नाटो सहयोगीहरूले त्यसपछि मस्को र किएभबीचको वार्तालाई सहज बनाउन ती हतियार युक्रेनलाई प्रदान गर्ने उल्लेख छ । ‘संयुक्त राज्य अमेरिकाले नाटो सहयोगीहरूलाई हाम्रा हतियारहरू बेचेर, त्यसले रुसीहरूलाई वार्ता टेबलमा आउन बाध्य पार्दै युद्धविरामको वातावरण सिर्जना गर्नेमा मलाई आशा छ’, उनले भने । लडाइँमा रहेका रुस र युक्रेनलाई युद्धविरामको स्थितिमा ल्याउन भन्दै अमेरिकी राष्ट्रपति ट्रम्पले यसै साताको सुरुमा १० दिनको ‘अल्टिमेटम’ दिँदै उक्त समयसीमाभित्र रुस नआएमा व्यापक मात्रामा भन्सार दर वृद्धि गर्नुका साथै थुप्रै दण्डहरू दिन सकिने चेतावनी दिएका थिए । जसमा शतप्रतिशत कर र रुसको व्यापार साझेदार देशहरूलाई समेत प्रतिबन्धहरू लगाइन सक्ने बताइएको छ ।